कामाला लागा…, शिंदेंच्या बैठकीत नेत्यांना सूचना, आगामी निवडणुकांबाबत मोठा निर्णय
आज एकनाथ शिंदे यांच्या उपस्थितीमध्ये शिवसेना शिंदे गटाची महत्त्वाची बैठक पार पडली, या बैठकीमध्ये एकनाथ शिंदे यांनी नेत्यांना काही महत्त्वाच्या सूचना दिल्या आहेत, तसंच त्यांचं अभिनंदन देखील केलं आहे.
आज उपमुख्यमंत्री एकनाथ शिंदे यांच्या उपस्थितीमध्ये शिवसेनेची महत्त्वाची बैठक पार पडली, या बैठकीला सर्व प्रमुख शिवसेना नेत्यांची उपस्थिती होती. या बैठकीमध्ये नगरपालिका आणि नगरपरिषद निवडणुकीवर चर्चा करण्यात आल्याची माहिती समोर येत आहे. पुढचे दोन महिने निवडणुका आहेत, काळजी घ्यावी लागेल, रोज अधिवेशनात हजेरी लावा, शिवसैनिकांना फोडण्याचा प्रयत्न हाणून पाडा अशा सूचना या बैठकीमध्ये एकनाथ शिंदे यांनी शिवसेना नेत्यांना दिल्या आहेत, तर दुसरीकडे या बैठकीमध्ये नेत्याचा काहीसा नाराजीचा सूर देखील दिसून आला. कार्यकर्त्यांना सांभाळा त्यांची कामे होत नाहीत, अशी नाराजी या बैठकीमध्ये नेत्यांनी व्यक्त केल्याची माहिती समोर येत आहे.
नेमकं काय म्हणाले एकनाथ शिंदे?
आज उपमुख्यमंत्री एकनाथ शिंदे यांच्या उपस्थितीमध्ये शिवसेना शिंदे गटाची महत्त्वाची बैठक पार पडली, या बैठकीमध्ये नागपुरात सुरू असलेल्या हिवाळी अधिवेशनापासून ते आगामी स्थानिक स्वराज्य संस्थांच्या निवडणुका अशा विविध विषयांवर चर्चा करण्यात आली. पुढचे दोन महिने निवडणुका आहेत, काळजी घ्यावी लागेल, रोज अधिवेशनात हजेरी लावा, शिवसैनिकांना फोडण्याचा प्रयत्न हाणून पाडा अशा सूचना या बैठकीमध्ये एकनाथ शिंदे यांनी शिवसेना नेत्यांना दिल्या आहेत.
दरम्यान पुढे बोलताना एकनाथ शिंदे यांनी म्हटलं की, 186 नगराध्यक्षपदाच्या आणि 4000 नगरसेवक पदाच्या जागा शिवसेना लढली, धनुष्यबाण गावागावात पोहचवण्यात यश मिळालं. आजवर शिवसेनेने कधीच एवढ्या जागा लढल्या नव्हत्या. तुम्हा सर्वांचा अभिमान आहे. या निवडणुकीत चांगलं वातावरण होतं. आपण चांगली लढत दिली. निकालही चांगला लागेल, असं म्हणत एकनाथ शिंदे यांनी यावेळी शिवसेना नेत्यांचं कौतुक केलं आहे. दरम्यान पालिका झेडपीच्या निवडणुका महायुती म्हणूनच लढणार आणि जिंकणार आहोत. युती धर्माचं पालन करा. कुठेही वादग्रस्त वक्तव्य नको. संघर्ष होईल अशी आपली वर्तणूक नको. नगरपालिका निवडणूकांमध्ये काही वाद झाला असेल तो विषय आता संपला आहे. झालं गेलं विसरून पुन्हा नव्या दमाने कामाला लागायचं आहे, अशा सूचना या बैठकीमध्ये एकनाथ शिंदे यांनी दिल्या आहेत.
