Maharashtra News LIVE : खासदारांना कोणत्याही निधीची कमतरता पडू देणार नाही : एकनाथ शिंदे

शिवसेना 6 खासदारांमुळे बळकट होईल. खासदारांचे कोणतेही काम थांबणार नाहीत. खासदारांना कोणत्याही निधीची कमतरता पडू देणार नाही. खासदारांचे प्रश्न प्रामाणिकपणे सोडवणार, असा शब्द शिंदेसेनेचे प्रमुख एकनाथ शिंदे यांनी या 6 खासदारांना दिला.

विचारधारा महत्त्वाची आहे. काही लोकांनी विचारधारा सोडली, त्यांना महाराष्ट्राने नाकारलं, असं म्हणत उपमुख्यमंत्री एकनाथ शिंदे यांनी ठाकरेंच्या शिवेसेनेचे प्रमुख उद्धव ठाकरे यांच्यावर टीका केली. महाराष्ट्र इतर राज्यांपेक्षा वेगळं आहे. महाराष्ट्र पुरोगामी आहे. राज्याची संस्कृती-परंपरा वेगळी आहे. त्यामुळे लोकांच्या मनात जे आहे ते देण्याचं काम केलंय. त्यामुळे अनेक जण शिवसेनेत येतायत आणि विचारधारेशी जोडले जात आहेत.

ठाकरेंच्या शिवसेनेतील 6 फुटीर खासदारांचा शिंदेच्या शिवसेनेतील प्रवेश कार्यक्रम सुरु आहे. या कार्यक्रमाचं आयोजन हे वाय बी चव्हाण सेंटरमध्ये कपरण्यात आलं आहे. एकनाथ शिंदे यांनी या खासदारांना उल्लेख टायगर म्हणून केला आहे.

अकोला जिल्ह्यात पावसाला सुरुवात झाली असून पातूर तालुक्यातील आलेगाव परिसरात जोरदार पावसाने हजेरी लावली आहे. आज सकाळपासूनच ढगाळ वातावरण निर्माण झालं होतं. त्यानंतर दुपारच्या सुमारास पावसाने जोरदार हजेरी लावली आहे.

रायगड जिल्ह्यात अखेर मान्सूनने दमदार हजेरी लावली असून खालापूर, कर्जत, पेन, सुधागड, माथेरान, खोपोली आणि पनवेल परिसरात जोरदार पावसाने हजेरी लावली आहे. गेल्या काही दिवसांपासून पावसाच्या प्रतीक्षेत असलेल्या शेतकऱ्यांना या पावसामुळे मोठा दिलासा मिळाला आहे. शेतकऱ्यांच्या चेहऱ्यावर समाधानाचे हास्य दिसून येत असून खरीप हंगामातील शेतीकामांना आता वेग येणार आहे.

शिवसेना ठाकरे गटाच्या 6 फुटीर खासदारांची थोड्याच वेळात पत्रकार परिषद होणार आहे. यात ते शिवसेनेत प्रवेश करण्याची घोषणा करण्याची शक्यता आहे. सध्या हे खासदार एकनाथ शिंदे यांच्यासोबत बैठक घेत आहेत.

भंडारा जिल्ह्यात आज हवामानात अचानक मोठा बदल पाहायला मिळाला. गेल्या काही दिवसांपासून संपूर्ण जिल्हा तीव्र उन्हाने आणि उकाड्याने होरपळून निघाला होता. आज सकाळीही नागरिकांना प्रचंड उष्णतेचा सामना करावा लागला. मात्र, दुपारी अचानक आकाशात काळ्या ढगांनी गर्दी केली आणि पावसाला सुरुवात झाली. या पावसामुळे वातावरणात झपाट्याने गारवा निर्माण झाला असून, सकाळपासून उष्णतेने हैराण झालेल्या भंडारावासीयांना खूप मोठा दिलासा मिळाला आहे.

कतारच्या सर्वात मोठ्या गॅस प्लांटमध्ये भीषण स्फोट. कतारमध्ये झालेल्या स्फोटामुळे ऊर्जा क्षेत्रात चिंता निर्माण. कतार एनर्जीतील स्फोटानंतर प्लांट परिसरात गोंधळाची स्थिती. स्फोटात किती नुकसान झालं याबाबत अधिकृत माहिती अद्याप समोर आलेली नाही

मविआचा पराभव झाला त्यात आश्चर्य वाटण्याचं कारण नाही. निवडणुका आणि मतांचे घोडेबाजार सुरु आहे. प्रत्येक मताला 10 लाखापासूनच सुरुवात करतात.  25-30 कोटी खर्च करुन निवडणूक लढवतात- विनायक राऊत

नागेश पाटील आष्टीकरांच्या पुत्राची ठाकरेंच्या शिवसेनेतून हकालपट्टी करण्यात आलीय. पक्षविरोधी कारवाया केल्याचा ठपका ठेवत कृष्णा आष्टीकरांची हकालपट्टी केल्याचं संजय राऊतांनी सांगितलंय, वडील शिंदेंच्या शिवसेनेत गेले तरी आपण मात्र ठाकरेंसोबत राहणार असल्याचा दावा कृष्णा पाटील आष्टीकर यांनी केला होता. मात्र आता नागेश पाटील आष्टीकरांचं विमानतळावर जंगी स्वागत करणार असल्याचं कृष्णा पाटील आष्टीकरांनी सांगितलंय

मुख्यमंत्री देवेंद्र फडणवीसांनी विधानसभेत पुरवणी मागण्या मांडल्या. अधिवेशनात 97 हजार कोटी रुपयांच्या पुरवणी मागण्या मांडल्या. शेतकरी कर्जमाफीसाठी दिल्या जाणाऱ्या निधीचीही तरतूद.

मिरा भाईंदर बालकल्याण समिती सभापती अनिता पाटील यांनी राजीनामा दिला तर त्यांच्या सख्ख्या भावाला फाशी होणार आहे का?, असं वादग्रस्त विधान आमदार नरेंद्र मेहता यांनी केलं होतं. त्यांच्या याच विधानामुळे विरोधक कमालीचे आक्रमक झाले आहेत. आमदार नरेंद्र मेहता यांच्या विधानाचा निषेध करत आणि पीडितेला न्याय देण्यासाठी विरोधकांनी महापालिका गेटबाहेर जोरदार घोषणाबाजी केली. त्यांचा तात्काळ राजीनामा घ्यावा, अशी आक्रमक भूमिका आंदोलकांनी घेतली आहे.

महायुती म्हणून आम्ही काम करणार, अशी प्रतिक्रिया मल्हार पाटील यांनी दिली आहे. खासदार ओमराजे निंबाळकर यांच्या शिवसेनेतील प्रवेशानंतर आणि पवन राजे निंबाळकर हत्याकांडाच्या निकालानंतर त्यांनी ही प्रतिक्रिया दिली. “माझ्या आजोबाच्या विरोधात षडयंत्र रचण्यात आलं, हे कोर्टाने नमूद केलं आहे. मी न्यायालयाच्या निर्णयाशी अतिशय समाधानी आहे. हे सर्व कट माझ्या आजोबाच्या विरोधात रचण्यात आले हे लोकांसमोर आलं. 17 वर्षानंतर हा निकाल आला याविषयी समाधानी आहे,” असं ते म्हणाले. एकनाथ शिंदे आणि माझ्या कुटुंबाचे चांगले संबंध आहेत, असं म्हणत त्यांनी थेट ओमराजेंवर बोलणं टाळलं.

मिलिंद नार्वेकर यांच्यासोबत माझा कोणताही वाद नाही. हॉर्न वाजवणारी गाडी राहुल नार्वेकरांची असल्याचं मला वाटलं. माझ्या डोक्यात राहुल नार्वेकर बसलेत. गाडीचा हॉर्न सातत्याने वाजवल्याने गोंधळ झाला. राहुल नार्वेकर समजून मी कोण नार्वेकर असं बोललो. मिलिंद नार्वेकर यांच्यासोबत माझे कोणतेही मतभेद नाहीत, असं भास्कर जाधव यांनी स्पष्ट केलं.

“भाजपला देशात दंगे आणि मतभेद निर्माण करता येतात. सरकार फक्त फसवी शेतकरी कर्जमाफी करतंय. निधी मिळत नाही म्हणून पळणारे स्वत:च्या निधीसाठी पळत आहेत. ओमराजे निंबाळकरांसोबत परिवार म्हणून उभे राहिले आहोत. खासदार फोडून गुलाम पक्षाला संविधान बदलायचं आहे. बंडखोरांनी राजीनामा देऊन निवडणूक लढवावी,” अशी टीका आदित्य ठाकरेंनी केली.

जळगाव विधान परिषद निवडणुकीतील महायुतीचे उमेदवार नंदकिशोर महाजन यांचा 582 मतांनी विजय झाला आहे. तर महाविकास आघाडीचे शिवसेना ठाकरे गटाचे उमेदवार शरद तायडे यांना फक्त 17 मतं मिळाली आहेत. अपक्ष उमेदवार अनिल चौधरी यांना 11 तर शिवसेना शिंदे गटाच्या बंडखोर रेश्मा काळे यांना केवळ 1 मत मिळालं आहे.

“निकाल लागला आहे. सांगली-सातारा विधान परिषद निवडणुकीत पक्ष आणि मित्र पक्षांनी संधी दिली. मला मतदान केलेल्या मतदारांचा मी मनापासून आभारी आहे. उमेदवारी निश्चित करताना मुख्यमंत्री देवेंद्र फडणवीस यांनी विश्वास टाकला. महायुतीची कोणतीही मतं फुटली नाहीत, महायुती म्हणून असणारी मते मिळाली आहेत” असं सांगली-सातारा विधान परिषदेचे विजयी उमेदवार धैर्यशील कदम म्हणाले.

धाराशिव बीड लातूर विधानपरिषद निवडणुकीत बसवराज पाटील यांचा विक्रमी 721 मतांनी विजय झाला आहे. त्या निमित्त भाजप महायुतीच्या कार्यकर्त्यांकडून विजयी जल्लोष करण्यात येत आहे.

सोलापूर विधान परिषदेचे विजयी उमेदवार राजेंद्र राऊत यांना मुख्यमंत्री देवेंद्र फडणवीस यांनी फोन करून दिल्या शुभेच्छा. सोलापूर विधान परिषदेचे महायुतीचे उमेदवार राजेंद्र राऊत यांचा दणदणीत विजय झाल्यानंतर मुख्यमंत्र्यांनी दिल्या शुभेच्छा. राजेंद्र राऊत यांना फोन करत विजयाच्या दिल्या शुभेच्छा. वसंत देशमुख यांचा दारुण पराभव केल्यानंतर मुख्यमंत्र्यांनी राजेंद्र राऊतांना दिल्या शुभेच्छा.

मी प्रचार थांबवला होता. पण कार्यकर्ते ऐकले नाहीत. कार्यकर्त्यांना विचारल्याशिवाय निर्णय घेणार नाही असं नाशिकचे विजयी उमेदवार गोकुळ गीते यांनी म्हटलं आहे. त्यांनी महायुतीचे अधिकृत उमेदवार नरेंद्र दराडे यांचा पराभव केला.

“माझ्या सर्व नेत्यांचे मी आभार मानतो. नांदेड जिल्ह्यातील दहाच्या दहा आमदारांनी घेतलेल्या मेहनतीचे फळ आहे. मला मुख्यमंत्री फडणवीस साहेबांचा शुभेच्छापर फोन आला होता. नागेश पाटील आष्टीकर यांच्या बंडखोरीचा आपल्याला फायदाच झाला. आष्टीकर यांनी बंड केल्याने मला महाविकास आघाडीची मते मिळाली” असं नांदेडचे महायुतीचे विजयी उमेदवार अमरनाथ राजूरकर म्हणाले.

मुंबई – विधान भवनाच्या पायऱ्यांवर विरोधकांचं आंदोलन. मुख्यमंत्री, उपमुख्यमंत्र्यांसमोर विरोधकांची जोरदार घोषणाबाजी. सातबारा कोरा झालाच पाहिजे, अशी मागणी विरोधकांकडून करण्यात येत आहे.

नाशिकचा निकाल मला अपेक्षितच होता असं वक्तव्य़ शिंदे सेनेचे आमदार किशोर पाटील यांनी केलं आहे.  त्यामुळेच जळगाव विधान परिषदेसाठी दोन अपक्ष उमेदवार दिले होते.  दोघेही अपक्ष उमेदवारांची उमेदवारी मागे घेण्यासाठी एकनाथ शिंदे यांनी सज्जड दम दिला. नाईलाजाने भारतीय जनता पार्टीचे काम करावे लागलं असं  किशोर पाटील म्हणाले.

नाशिक – गोकुळ गीते यांचे विश्वासू नाना गामने यांना मंत्री उदय सामंत यांचा फोन. गोकळ गीते यांना शिवसेना पुरस्कृत करावे अशी मागणी केली .  मंत्री उदय सामंत नाशिक मध्ये दाखल झाल्यानंतर गोकुळ गीते यांना भेटण्यासाठी घेऊन या अशी देखील विनंती केली.

हा निकाल आमच्यासाठी अतिशय धक्कादायक आहे. आम्ही नाशिकमध्ये खूप प्रयत्न केले. तरीही मतदारांनी आमच्या बाजूने कौल दिला नाही.  आम्ही एकनाथ शिंदेंची लवकरच भेट घेणार आहोत. दराडे यांच्या पराभवाची कारणं शोधू  – गिरीश महाजन

नाशिकमध्ये भाजपच्या सर्व उमेदवारांनी गोकुळ गीतेंना मतं दिली. नाशिकमध्ये आम्ही गोकुळ गीतेंना मदत केली, आमचं मतदान आम्ही गीतेंकडे वळवलं – संजय राऊतांचा गौप्यस्फोट

सोलापूर विधान परिषद निवडणुकीत भाजपचे राजेंद्र राऊत विजयी झालेत. राजेंद्र राऊत यांना 483 मते तर राष्ट्रवादी शरद पवार गटाच्या वसंत देशमुख यांना 118 मतं मिळाली.  राजेंद्र राऊत 365 हे मतांनी विजयी झाले. तर 13 मतं बाद झाली.

विधान परिषद निवडणूक – नागपूरमध्ये भाजप उमेदवार राजीव पोतदार यांचा विजय झाला आहे.  काँग्रेसचे उमेदवार अतुल लोंढे झाले पराभूत. लोंढे यांना 130 मतं  मिळाली.

अमरावती विधान परिषद निवडणूकीत भाजपच्या प्रवीण पोटे यांचा विजय झाला आहे.   भाजपच्या प्रवीण पोटे यांना 390 मतं मिळाली,  तर वंचित बहुजन आघाडीच्या निलेश विश्वकर्मांना 31 मतं,  काँग्रेसच्या हर्षजित देशमुख यांना 0 मतं मिळाली.

महायुतीचे उमेदवार नरेंद्र दराडे यांची मुलगी निकालानंतर भावूक झाली. गोकुळ गीते यांनी आघाडी घेताच नरेंद्र दराडे आणि त्यांच्या कन्या मतमोजणी केंद्र सोडताना भावुक. सगळ्या नेत्यांनी विश्वासघात केला म्हणत प्रियंका दराडे काकड यांना अश्रू अनावर

महाविकास आघाडीचे उमेदवार शरद तायडे यांनी पुन्हा एकदा निवडणूक प्रक्रियेवर संशय घेतला आहे. महायुतीच्या उमेदवाराकडे धनशक्ती होते आता कोणाचा विजय होतो ते पाहू- तायडे. मनात धाकधूक नाही परंतु निवडणूक बिनविरोध झाले नाही आम्हाला हा आनंद आहे. मॅजिक पेन म्हणत पुन्हा एकदा निवडणूक प्रक्रियेवर शरद तायडे यांनी संशय व्यक्त केला आहे. महायुतीच्या उमेदवाराने जर 100% विजयाचा दावा केला असेल तर मॅजिक पेनचा विषय असेलच:- तायडे

महायुतीचे उमेदवार नंदकिशोर महाजन यांनी निकालापूर्वी विजयाचा दावा केला आहे. महायुतीच्या बाजूने शंभर टक्के निकाल लागणार आहे मी सर्व मतदार बांधवांचे आभार मानतो. गेल्या वीस वर्षापासून मी भारतीय जनता पार्टी सोबत काम करतोय, मी पक्षाच्या विचारांशी बांधील आहे. मला 500 पेक्षा जास्त मतं मिळतील असा विश्वास नंदकिशोर महाजन यांनी व्यक्त केला आहे

नाशिक विधान परिषदेच्या निवडणुकीत मोठा धक्का बसत आहे. थेट अपक्ष उमेदवार गोकुळ गित्ते आघाडीवर आहेत.

नंदकिशोर महाजन यांच्या विजयाच्या घोषणाची औपचारिकता बाकी. नागपूर आणि छत्रपती संभाजीनगरमध्ये महायुतीचे उमेदवार विजयी झाली आहेत.

विधान परिषद निवडणुकीचा पहिला निकाल हाती आला असून भाजपाचा नागपूरचा पहिला उमेदवार विजयी झाला आहे.

महायुतीचे उमेदवार नरेंद्र दराडे यांचे बंधू शिक्षक आमदार किशोर दराडे यांच्या उपस्थितीला गीते यांनी घेतला होता आक्षेप. निवडणूक निर्णय अधिकाऱ्यांसमोर झालेल्या सुनावणीत गीते यांच्या आक्षेपाचं करण्यात आलं निरसन. मतमोजणीच्या प्रक्रियेला सुरुवात

त्याच्याआधी, साधारण ११ वाजता ते याबद्दलचं ऑफिशियल लेटर आणि फोटो जाहीर करतील. या सर्व खासदारांचं वेळापत्रक असं असेल: दुपारी १ वाजता ते कलिना एअरपोर्टवर लँड होतील, त्यानंतर २ वाजता त्यांची एक मीटिंग होईल आणि शेवटी दुपारी ४ वाजता ते मीडियासोबत प्रेस कॉन्फरन्स घेतील.

बीड जिल्ह्यात 143 मध्यम आणि लघु प्रकल्प आहेत. यापैकी 14 प्रकल्प कोरडेठाक पडले आहेत. तर जिल्ह्यातील 79 प्रकल्पात मृतसाठा उपलब्ध. जून महिना संपत आला तरीही पाऊस नसल्याने शेतकऱ्यांची चिंता वाढली.

सकाळपासूनच अधूनमधून पाऊस पडत असल्याने वातावरणात गारवा निर्माण झाला असून संपूर्ण परिसर ढगाळ वातावरणाने व्यापला आहे. पालघर जिल्ह्यासाठी आज यलो अलर्ट जारी करण्यात आला असून त्याच पार्श्वभूमीवर सकाळपासूनच पावसाने हजेरी लावण्यास सुरुवात केली आहे. रिमझिम पडत असलेल्या वातावरणामुळे शेतकरी वर्गात आनंदाचे वातावरण निर्माण झाले आहे. तर खरीप हंगामाच्या तयारीला वेग येण्याची अपेक्षा व्यक्त केली जात आहे.

पुणे जिल्ह्यातील खेड तालुक्यातील पिंपरी खुर्द गावात विद्युत रोहित्र (डीपी) चोरी झाल्याने संपूर्ण गावाचा पाणीपुरवठा ठप्प झाला आहे. चोरट्यांनी रोहित्रातील ऑईल आणि तारा लांबविल्यामुळे जलजीवन मिशनच्या पाणीपुरवठा योजनेवर परिणाम झाला असून ग्रामस्थांसमोर पिण्याच्या पाण्याचा गंभीर प्रश्न निर्माण झाला आहे. आठवडाभरात दुसऱ्यांदा झालेल्या चोरीच्या घटनेमुळे ग्रामस्थांमध्ये संतापाचे वातावरण असून चोरट्यांचा तातडीने बंदोबस्त करण्याची मागणी जोर धरत आहे. दरम्यान, पाणीपुरवठा पूर्ववत करण्यासाठी महावितरणने तात्काळ नवीन रोहित्र बसवावे, अशी मागणी ग्रामस्थांनी केली आहे.

कल्याण नगर महामार्गावर भीषण अपघात झाला आहे. ट्रकने दुचाकीला जोरदार धडक दिली आहे. अपघाताचा थरार सीसीटीव्ही कॅमेरात कैद झाला असून अपघातात बाप लेकीचा जागीच मृत्यू झाला आहे. मृतांमध्ये एक पुरुष, पाच वर्षीय चिमुकलीचा समावेश आहे.  दोन मुले आणि एक महिला गंभीर जखमी असून जखमींवर खासगी रुग्णालयात उपचार सुरू आहे.

जळगावातील जिल्हाधिकारी कार्यालयातील अल्पबचत भवन येथे मतमोजणीसाठी प्रशासन सज्ज झालं आहे. पोलिसांचा मोठा बंदोबस्त या ठिकाणी मतमोजणीच्या आवारात तैनात करण्यात आला आहे. शिवसेना शिंदे गटाकडून बंडखोरी तसेच मतदानाच्या पूर्वसंध्येला अपक्ष उमेदवाराचे माघार यामुळे जळगावच्या निवडणुकीत राज्यात चर्चेचा विषय बनली होती. महायुतीचे भाजपचे उमेदवार नंदकिशोर महाजन व महाविकास आघाडीचे ठाकरे गटाचे शरद तायडे यांच्यात थेट लढत पार पडली. उमेदवारांच्या भाग्याचा फैसला आज होणार असून निकालाकडे जिल्ह्याचे लक्ष लागला आहे.

सांगली सातारा विधान परिषदेच्या निवडणुकीची मतमोजणी आज पार पडणार आहे.सांगली येथील तरुण भारत क्रीडांगण येथे मतमोजणी होणार आहे. सकाळी आठ वाजल्यापासून मतमोजणीची प्रक्रिया सुरू होणार असून ही निवडणूक दुरंगी झाल्याचे चित्र स्पष्ट झालेले आहे. महायुती भाजपकडून धैर्यशील कदम तर महाआघाडीकडून अभयसिंह जगताप या दोघांमध्ये लढत खऱ्या अर्थाने झाली आहे.  99.89% इतके मतदान झाले असून सांगली खानापूर विटा तालुक्यातील एका मतदाराने गैरहजेरी लावले होते. त्यामुळे 895 पैकी 894 इतके मतदान झाले आहे. सकाळी आठ वाजल्या पासून मतमोजणी सुरु होणार असून जय आणि पराजय कोणाचा हे 11 वाजे पर्यंत चित्र स्पष्ट होईल. यंदाच्या निवडणुकीमध्ये महायुतीचे उमेदवार धैर्यशील कदम यांना अवघड वाटणारे निवडणूक शेवटच्या टप्प्यात महायुतीने एक दिलाने लढल्याने थोडीशी सोपी झाल्याचे दिसून आले आहे.पण अंडर करंट असू शकतो अशीही चर्चा मतदारांमध्ये होती.या निवडणुकीमध्ये प्रचार सभा नसून गुप्त बैठका व सेटिंग यावर दोन्ही गटाकडून जोर लावण्यात आला होता आज या विधान परिषदेचा आमदार कोण होणार ते चित्र स्पष्ट होणार आहे

विधान परिषदेच्या उस्मानाबाद- लातूर-बीड स्थानिक प्राधिकारी मतदारसंघाच्या निवडणुकीची मतमोजणी आज पार पडत आहे सकाळी ८ वाजता सुरू होणार आहे.ही मतमोजणी भाई उद्धवराव पाटील शासकीय औद्योगिक प्रशिक्षण संस्था (आयटीआय) धाराशिव येथे होणार असून प्रशासनाने आवश्यक सर्व तयारी पूर्ण केली आहे. या पार्श्वभूमीवर मोठा पोलीस बंदोबस्त ठेवण्यात आला आहे महायुतीचे उमेदवार बसवराज पाटील तर महाविकास आघाडीचे उमेदवार महेश देशमुख यांच्यामध्ये झाली होती लढत थोड्याच वेळात निकाल हाती येणार

शिक्रापूर पोलीस ठाणे हद्दीतील औद्योगिकीकरण वाढत असताना गुन्हेगारीला आळा घालण्यासाठी पुणे ग्रामीण पोलिसांनी मोठी कारवाई केली आहे. खुनाचा प्रयत्न, खंडणी, अग्निशस्त्रासह हल्ला असे गंभीर गुन्हे करणाऱ्या सराईत गुन्हेगाराला महाराष्ट्र धोकादायक व्यक्ती प्रतिबंधक कायदा MPDDA अंतर्गत स्थानबद्ध करून नागपूर मध्यवर्ती कारागृहात पाठवले आहे. गणेश भाऊसाहेब फडतरे, वय 35, रा. फडतरेवस्ती, कोरेगाव भीमा, ता. शिरूर, जि. पुणे असे स्थानबद्ध करण्यात आलेल्या इसमाचे नाव आहे.

मुंबईकरांची प्रतीक्षा संपली. अखेर मान्सूनने मुंबईसह उपनगरात हजेरी लावली आहे. कांदिवली, मालाड, बोरिवली, गोरेगावसह सर्वच भागांत पावसाला सुरुवात झाली आहे. गेल्या 15 मिनिटांपासून मुंबईच्या उपनगरात पाऊस सुरू आहे. कांदिवली, मालाड, बोरिवली, गोरेगाव परिसरात पाऊस सुरू आहेत. मान्सूनच्या आगमनाने मुंबईकरांना उकाड्यापासून दिलासा मिळाला आहे.

अमरावतीत विधान परिषद निवडणुकीच्या मतमोजणी पूर्वीच भाजपाचे उमेदवार प्रवीण पोटे यांच्या विजयाच्या अभिनंदनाचे  बॅनर लागले आहेत. अमरावतीच्या गर्ल्स हायस्कूल चौकात प्रवीण पोटे यांच्या समर्थकांनी विजयाचे बॅनर लावले. जिल्ह्याचे विकास पुरुष विधान परिषदमध्ये भरघोस मतांनी निवडून आल्याबद्दल प्रवीण पोटे पाटील यांचे अभिनंदन असा उल्लेख  बॅनरवर केला आहे.

मुंबईत आज सकाळपासूनच हवामानात अचानक बदल झाला असून, दादर आणि आसपासच्या परिसरात ढगाळ वातावरणात पावसाला सुरुवात झाली आहे. या पहिल्यावहिल्या दमदार सरींमुळे वातावरणात छान गारवा निर्माण झाला आहे. गेल्या काही दिवसांपासून प्रचंड उकाड्याने हैराण झालेल्या सामान्य नागरिकांना यामुळे मोठा दिलासा मिळाला आहे.