Maharashtra News LIVE: फटाक्यांमुळे पश्चिम रेल्वे विस्कळीत; सिग्नल यंत्रणेत बिघाड

मुंबई उपनगरात काल रात्री आगीच्या घटनांनी खळबळ उडाली. जोगेश्वरी, अंधेरी, मालवणी आणि कांदिवली अशा चार ठिकाणी आगी लागल्याच्या घटना समोर आल्या आहेत. जोगेश्वरीतील जेव्हीएलआर परिसरात वेस्टर्न एक्स्प्रेस हायवेच्या जवळ मोठी आग लागली होती. आगीची तीव्रता अधिक असल्याने अग्निशमन दलाला ती विझवण्यासाठी अथक प्रयत्न करावे लागले. त्याचवेळी अंधेरीतील मरोळ मिलिटरी रोड परिसरात लेव्हल २ ची आग लागल्याची घटना घडली. मालवणी परिसरातही आग लागल्याची माहिती समोर आली आहे. तर कांदिवली पश्चिम येथील कांदिवली रिक्रिएशन क्लब (केआरसी) च्या गार्डन परिसरातही काल रात्री आग लागली होती. घटनेची माहिती मिळताच अग्निशमन दलाने रात्री उशिरा घटनास्थळी धाव घेत आग विझवली.

दिवाळीच्या लक्ष्मीपूजनाच्या शुभमुहूर्तावर नाशिकच्या बाजारपेठेत खरेदीचा उत्साह पाहायला मिळाला. सोने-चांदी, दुचाकी, चारचाकी वाहने, कपडे, घरे आणि पूजासाहित्याच्या खरेदीसाठी नागरिकांनी बाजारपेठांमध्ये मोठी गर्दी केली होती. विशेष म्हणजे, यंदा लक्ष्मीपूजनाच्या एकाच मुहूर्तावर नाशिकमध्ये तब्बल 800 कोटी रुपयांची उलाढाल झाल्याची माहिती समोर आली आहे. सोन्याच्या दरात काहीशी घसरण झाल्याने सोने खरेदीसाठी ग्राहकांनी विशेष पसंती दिली. याशिवाय वाहन आणि गृहखरेदीलाही नागरिकांचा चांगला प्रतिसाद मिळाला. या मुहूर्तावर सुमारे 3 हजार 750 दुचाकींची विक्री झाली असून, 450 चारचाकी वाहनांचीही खरेदी करण्यात आली. तर 700 हून अधिक घरांचे व्यवहार झाल्याची माहिती आहे.

नाशिकमधील प्रसिद्ध धार्मिक स्थळांना धमकीचा ई-मेल प्राप्त झाल्याने परिसरात खळबळ उडाली आहे. त्र्यंबकेश्वर देवस्थान, सप्तशृंगी गडावरील सप्तशृंगी देवी मंदिर आणि नाशिकमधील काळाराम मंदिराला नुकसान पोहोचवण्याची धमकी या ई-मेलद्वारे देण्यात आल्याची माहिती समोर आली आहे. ऐन दिवाळीच्या सणात हा धमकीचा ई-मेल आल्याने पोलीस प्रशासन सतर्क झाले असून, तिन्ही देवस्थानांच्या सुरक्षेत वाढ करण्यात आली आहे. दिवाळीच्या सुट्ट्यांमुळे या धार्मिक स्थळांवर दर्शनासाठी मोठ्या संख्येने भाविक आणि पर्यटक दाखल होत आहेत. त्यामुळे गर्दीचे नियोजन आणि भाविकांची सुरक्षितता लक्षात घेऊन मंदिर परिसरात पोलीस बंदोबस्त वाढवण्यात आला आहे. तसेच संशयास्पद हालचालींवर पोलिसांकडून बारकाईने लक्ष ठेवले जात आहे.

धाराशिव तालुक्यातील येडशी इथं मध्यरात्री अडीचच्या सुमारास घराला भीषण आग लागली. गोविंद करंडे यांच्या घराला लागलेल्या आगीत सहा जणांचा मृत्यू झाल्याची प्राथमिक माहिती आहे. मृतांमध्ये करंडे यांचे आई-वडील, दोन मुली आणि पती-पत्नीचा समावेश आहे. घटनेची माहिती मिळताच आमदार राणा जगजितसिंह पाटील यांनी पहाटे 4.20 वाजता घटनास्थळी धाव घेतली.

पुणेकरांना आता दिवाळीनंतर हळूहळू थंडीचा अनुभव येऊ लागला आहे. शहरात थंडीची चाहूल लागली असून, काही भागांमध्ये सकाळच्या वेळी धुकेही पडण्यास सुरुवात झाली आहे. गेल्या काही दिवसांपासून पुणे शहराच्या किमान तापमानात सातत्याने घट नोंदविण्यात येत असल्याने रात्री आणि पहाटेच्या वेळी गारवा जाणवू लागला आहे. विशेषतः सकाळी घराबाहेर पडणाऱ्या नागरिकांना थंडीचा अनुभव येत आहे. दिवाळीच्या काळातच वातावरणात झालेला हा बदल पुणेकरांसाठी सुखद ठरत आहे. दरम्यान, येत्या काही दिवसांत शहराच्या तापमानात आणखी घट होण्याची शक्यता भारतीय हवामानशास्त्र विभागाच्या पुणे विभागाने वर्तवली आहे.

लक्ष्मीपूजनानंतर मुंबईकरांचा कामावर जाण्याचा प्रवास आज खोळंबला आहे. विरार आणि नालासोपारा स्थानकांदरम्यान सिग्नल यंत्रणेत तांत्रिक बिघाड झाल्याने पश्चिम रेल्वेची लोकल वाहतूक विस्कळीत झाली आहे. लक्ष्मीपूजनाच्या रात्री मोठ्या प्रमाणात फोडण्यात आलेल्या फटाक्यांमुळे रेल्वेच्या सिग्नल वायरिंगला आग लागून त्या जळाल्याची प्राथमिक माहिती समोर येत आहे. या बिघाडाचा परिणाम पश्चिम रेल्वेच्या वाहतुकीवर झाला असून, विरारहून चर्चगेटच्या दिशेने जाणाऱ्या लोकल सुमारे 15 ते 30 मिनिटे उशिराने धावत आहेत. सकाळच्या गर्दीच्या वेळेत हा प्रकार घडल्याने कामावर जाणाऱ्या चाकरमान्यांचे मोठे हाल होत आहेत.