Shivsena : जालन्यात शिंदेंच्या शिवसेनेला मोठा धक्का; मंठा-परतूरमधील सर्व पदाधिकाऱ्यांचे सामूहिक राजीनामे, नेमकं कारण काय?

जालना जिल्ह्यातून एक मोठी राजकीय बातमी समोर आली आहे. उपमुख्यमंत्री एकनाथ शिंदे यांच्या नेतृत्वाखालील शिवसेनेला जालन्यामध्ये मोठा धक्का बसला आहे. मंठा-परतूर विधानसभा मतदारसंघातील शिंदेंच्या शिवसेनेच्या सर्व पदाधिकाऱ्यांनी आपल्या पदांचे सामूहिक राजीनामे दिले आहेत. जिल्हाप्रमुख आसाराम बोराडे यांच्या कार्यपद्धतीवर नाराजी व्यक्त करत पदाधिकाऱ्यांनी हा निर्णय घेतला आहे.

मिळालेल्या माहितीनुसार, गेले एक वर्ष पदाधिकाऱ्यांना वारंवार डावलले जात असल्याने त्यांच्यात तीव्र असंतोष होता. “एक वर्ष झालं आम्ही बघतोय, आम्हाला वारंवार डावललं जात आहे,” असे नाराज पदाधिकाऱ्यांनी म्हटले आहे. आसाराम बोराडे हे पूर्वी ठाकरे गटात होते आणि नंतर त्यांनी शिंदे गटात प्रवेश केला होता. त्यांच्या कार्यपद्धतीमुळे स्थानिक पदाधिकाऱ्यांमध्ये नाराजीचा सूर होता.

या सामूहिक राजीनाम्यांचे पत्र सर्व पदाधिकाऱ्यांच्या सह्यांनी उपमुख्यमंत्री एकनाथ शिंदे यांच्याकडे पाठवण्यात येणार आहे. “साहेबांनी आमचे राजीनामे स्वीकारून आम्हाला काहीतरी पुढचा न्याय द्यावा,” अशी मागणी राजीनामा दिलेल्या पदाधिकाऱ्यांनी केली आहे. उपमुख्यमंत्री एकनाथ शिंदे यांच्या जालना जिल्ह्याच्या नियोजित दौऱ्याआधीच हा पक्षाला मिळालेला मोठा धक्का मानला जात आहे, ज्यामुळे स्थानिक पातळीवरील पक्षांतर्गत गटबाजी उघड झाली आहे.