Gokul : गोकुळवरून कोल्हापुरात राजकीय रणसंग्राम; सतेज पाटलांच्या नेतृत्वात आज मोर्चा, धनंजय महाडिक म्हणाले…

गोकुळ दूध संघावर चार सरकारी नियुक्त सदस्य नेमल्याने कोल्हापूरचे राजकीय वातावरण चांगलेच तापले आहे. या निर्णयाविरोधात आमदार सतेज पाटील यांच्या नेतृत्वात समविचारी आघाडी आज कोल्हापुरात मोर्चा काढत आहे. गोकुळच्या अध्यक्ष निवडीसाठी कोरम पूर्ण होत नसल्याने राज्य सरकारने हे चार सदस्य नियुक्त केले आहेत.

या नियुक्तीमुळे गोकुळ संघ महायुतीच्या ताब्यात जाण्याचा मार्ग मोकळा झाल्याचा आरोप समविचारी आघाडी करत आहे. धनंजय महाडिक यांनी मात्र या मोर्चाच्या गर्दीबाबत शंका व्यक्त केली आहे. दिवाळीच्या सणासुदीच्या काळात अशा मोर्चांमुळे व्यापारावर परिणाम होतो, असे त्यांचे म्हणणे आहे. तसेच, कोरम पूर्ण करण्यासाठी आणि संघाचा कारभार योग्य रीतीने चालवण्यासाठी हे सदस्य नियुक्त करण्यात आल्याचे त्यांनी म्हटले आहे. मुख्यमंत्री महोदयांनी विचारपूर्वक हा निर्णय घेतला असून, संघावर कब्जा करण्याची सरकारची भावना चुकीची असल्याचे महाडिक यांनी स्पष्ट केले.