हायवेवर कथित पोलिसाचा मद्यधुंद अवस्थेत डान्स, आमदार संजय गायकवाडांनी कानाखाली जाळ काढला
मद्यधुंद अवस्थेत महामार्गावर नाचणाऱ्या पोलिसांमुळे ट्राफिक जाम झाला आणि तेवढ्यात औरंगाबाद येथून बुलडाण्याकडे जाणारे शिवसेनेचे आमदार संजय गायकवाड यांनी एका पोलिसाला कानाखाली वाजवली. त्यानंतर 'पोलीस' लिहिलेली पाटी असलेल्या कारमध्ये बसून मद्यपी पोलिसांनी पळ काढला.
बुलडाणा : मद्यधुंद अवस्थेत महामार्गावर नाचणाऱ्या कथित पोलिसाच्या कानाखाली शिवसेना आमदार संजय गायकवाड (Sanjay Gaikwad) यांनी ‘आवाज’ काढला. बुलडाण्यात देऊळगाव राजा मार्गावरील सरंबा फाट्यावर ही घटना घडल्याची माहिती आहे. पोलिसाची पाटी लिहिलेली कार रस्त्यावर उभी करून काही जण नाचत होते, त्यामुळे ट्राफिकही जाम झाला होता. या घटनेचा व्हिडीओ समोर आला आहे.
काय आहे प्रकरण?
मद्यधुंद अवस्थेत महामार्गावर नाचणाऱ्या पोलिसांमुळे ट्राफिक जाम झाला आणि तेवढ्यात औरंगाबाद येथून बुलडाण्याकडे जाणारे शिवसेनेचे आमदार संजय गायकवाड यांनी एका पोलिसाला कानाखाली वाजवली. त्यानंतर ‘पोलीस’ लिहिलेली पाटी असलेल्या कारमध्ये बसून मद्यपी पोलिसांनी पळ काढला. हा संपूर्ण प्रकार देऊळगाव महीजवळ असलेल्या सरंबा फाट्यावर रविवारी सायंकाळी घडला असल्याची चर्चा जिल्ह्यात सुरु आहे. आपल्या वाहनावावर ‘पोलीस’ अशी पाटी लावून धुडगूस घालणारे हे नेमके कोण होते? आणि अशी पाटी लावणे योग्य आहे का? याबाबत पोलीस विभागाने आता आता चौकशी करणे गरजेचे आहे.
नेमकं काय घडलं?
स्वाभिमानी शेतकरी संघटनेचे राणा चंदन यांना औरंगाबाद येथील रुग्णालयात भेटून आमदार संजय गायकवाड परत येत होते. त्यावेळी देऊळगाव महीजवळ असलेल्या सरंबा फाट्याजवळ महामार्गावर वाहतूक ठप्प झाली होती. ट्राफिक जाममधून पुढे जाऊन पाहिले असता रस्त्याच्या मधोमध ‘पोलीस’ अशी पाटी असलेली एम एच 28 एएन 3641 क्रमांकाच्या पांढऱ्या रंगाच्या कारसमोर काही व्यक्ती मद्यधुंद अवस्थेत नाचत होते.
कथित पोलिसाला कानाखाली वाजवल्या
यावेळी चिखली येथून येणारी वाहतूक दूरपर्यंत ठप्प झाली होती. हा प्रकार पाहून बुलडाणा येथील आमदार संजय गायकवाड यांचा राग अनावर झाला आणि त्यांनी त्या कथित पोलिसाला कानाखाली दोन वाजवल्या. अचानक घडलेल्या या प्रकाराने भांबावलेल्या मद्यधुंद व्यक्तींचा डान्स बंद झाला आणि पोलीस लिहिलेल्या पांढऱ्या कारमध्ये बसून त्यांनी पळ काढला. बुलडाणा पासिंग असलेल्या त्या कारद्वारे नेमका कुठल्या पोलीस ठाण्यातील मद्यधुंद पोलीस प्रवास करत होते, याचा उलगडा होणे बाकी आहे.
पाहा व्हिडीओ :
गायकवाडांच्या वक्तव्यांची चर्चा
नागरिकांनी रोग प्रतिकारशक्‍ती वाढविण्यासाठी जास्तीत जास्त मांसाहार सेवन करावा, असं बुलडाणा मतदारसंघाचे शिवसेनेचे आमदार संजय गायकवाड काही महिन्यांपूर्वी म्हणाले होते. मात्र या वक्तव्यावरुन ज्यांच्या भावना दुखावल्या असतील त्यांची दिलगिरीही गायकवाडांनी व्यक्त केली. ज्यांची मनं दुखावली, त्याबद्दल दिलगिरी व्यक्त करत आहे. मात्र, ज्यांनी या विषयाचं राजकारण केलं, त्यांची माफी मागणार नाही, असंही संजय गायकवाड म्हणाले होते.
संबंधित बातम्या :
VIDEO | गाडीतून उतरले, शर्ट काढत झाड हटवलं, शिवसेना आमदार संजय गायकवाड यांचा ‘बाहुबली’ अवतार
