मालेगाव महापालिकेत खळबळ ! आयुक्त रवींद्र जाधव यांच्यासह तिघांना अटक; निवृत्तीच्या एक दिवस आधी ACB ची कारवाई

मालेगाव महानगरपालिकेत मोठी खळबळ उडवणारी घटना समोर आली आहे. लाचलुचपत प्रतिबंधक विभागाने (ACB) महापालिका आयुक्त रवींद्र जाधव यांच्यासह त्यांच्या स्वीय सहाय्यक निलेश पाटील आणि अकाउंटंट हरीश डिंबर यांना अटक केली आहे. ठेकेदाराच्या कामांची बिलं मंजूर करून देण्यासाठी लाचेची मागणी केल्याच्या तक्रारीवरून ही कारवाई करण्यात आल्याची माहिती आहे. विशेष म्हणजे, आयुक्त रवींद्र जाधव हे 31 ऑक्टोबर रोजी सेवानिवृत्त होणार होते. निवृत्तीच्या अवघ्या एक दिवस आधी त्यांच्यावर झालेल्या या कारवाईमुळे मालेगाव महापालिका वर्तुळात खळबळ उडाली आहे.

काय आहे नेमकं प्रकरण ?

मिळालेल्या माहितीनुसार, महापालिकेच्या माध्यमातून करण्यात आलेल्या गवत काढण्याच्या आणि जलवाहिनी दुरुस्तीच्या कामांची बिले अदा करण्यासाठी ठेकेदाराकडे लाचेची मागणी करण्यात आल्याची तक्रार लाचलुचपत प्रतिबंधक विभागाकडे करण्यात आली होती. दोन वेगवेगळ्या कामांची सुमारे 20 लाख रुपयांची बिलं मंजूर करून देण्यासाठी चार टक्के लाच मागण्यात आली होती असा आरोप आहे. या तक्रारीची दखल घेत ACB ने कारवाई केली. या प्रकरणी आयुक्त रवींद्र जाधव, त्यांचे स्वीय सहाय्यक निलेश पाटील आणि अकाउंटंट हरीश डिंबर यांना अटक करण्यात आली आहे.

आरोपींच्या घरांची झडती सुरू

या कारवाईनंतर लाचलुचपत प्रतिबंधक विभागाकडून संबंधित आरोपींच्या घरांची झडती घेण्याचे काम सुरू असल्याची माहिती समोर आली आहे. या प्रकरणात आणखी काही माहिती समोर येते का, याकडे लक्ष लागलं आहे. दरम्यान, आयुक्तांसारख्या वरिष्ठ अधिकाऱ्यावर झालेल्या कारवाईमुळे महापालिकेतील अधिकारी आणि कर्मचारी वर्गातही चर्चेला उधाण आले आहे.

या संपूर्ण कारवाईबाबत लाचलुचपत प्रतिबंधक विभागाचे पोलीस अधीक्षक भारत तांगडे यांनी माहिती दिली आहे. तीन जणांना अटक करण्यात आली आहे. ठेकेदाराच्या बिलांचे पैसे अदा करण्यासाठी लाचेची मागणी केल्याच्या तक्रारीवरून ही कारवाई करण्यात आल्याचे त्यांनी सांगितलं. सध्या या प्रकरणाचा पुढील तपास सुरू असून, झडतीदरम्यान काय माहिती समोर येते आणि तपासात आणखी कोणते तपशील उघड होतात, याकडे सर्वांचे लक्ष लागले आहे.