CET मध्येही महाघोटाळा ? त्या आरोपांत काही तथ्य नाही, CET सेलकडून खंडन;आयुक्तांनी सगळं स्पष्टच सांगितलं

NEET पेपरफुटीविरोधात कॉक्रोच जनता पार्टीने (CJP) केलेलं आंदोलन देशभरात गाजलं. त्यावरून सुरू झालेला गदारोळ शिक्षणमत्र्यांच्या राजीनाम्यानंतर जरा थंडावला. ते प्रकरण शांत होतं ना होतं तोच आता राज्यात NEET पेक्षाही MHT-CET मध्येही महाघोटाळा झाल्याचा आरोप विरोधकांनी केला असून त्यामुळे पुन्हा खळबळ माजली आहे.  राष्ट्रवादीचे महादेव बालगुडे यांनी एका शिक्षकाचा व्हिडिओ त्यांच्या सोशल मीडिया एक्स हँडलवरून शेअर केला आहे. त्यात एका शिक्षकाने एमएच-सीईटी 2026 मध्ये कसा महाघोटाळा झाला याविषयी भाष्य केल्याने परत उलटसुलट चर्चा सुरू झाली आहे. मात्र आता याप्रकरणावर CET सेलने मौन सोडलं असून पेपर घोटाळ्याच्या आरोपांचं खंडन करण्यात आलं आहे.

सोशल मीडियावरील आरोपांमध्ये काहीही तथ्य नाही, असं म्हणत CET सेलचे आयुक्त सरदेसाई यांनी स्पष्टीकरण दिलं आहे. काही विद्यार्थी बोर्डापेक्षा सीईटीला जास्त प्राधान्य देतात, त्यामुळे त्यांना सीईटी परीक्षेत जास्त गुण असतात. दोन परीक्षांमध्ये तुलना करण चुकीचं आहे. टक्के आणि पर्सेंटाईल यांची तुलना चुकीची असल्याचं सीईटी सेलचे आयुक्त दिलीप सरदेसाई यांनी सांगितलं. सध्या आलेल्या आक्षेपांच्या अनुषंगाने अंतर्गत विश्लेषण करण्यात येणार आहे, त्यानंतरच आम्ही पुढील निर्णय घेऊ,  असंही त्यांनी नमूद केलं.

काय म्हणाले सीईटी सेलचे आयुक्त ?

एका परीक्षेत असलेल्या परफॉर्मन्सप्रमाणे दुसऱ्या परीक्षेतही तसाच परफॉर्मन्स दिला पाहिजे ही अपेक्षा काही योग्य नाही. दुसरी गोष्ट म्हणजे पर्सेंटाइल आणि पर्सेंटेज या दोन्ही पद्धती वेगळ्या आहेत. पर्सेंटाइल पद्धती ही त्या त्या बॅचसाठी असते, त्यामध्ये जो टॉपर असतो, त्याला 100 पर्सेंटाइल म्हणतात. त्या रॉ स्कोअर 70, 80ल किंवा 90 टक्के, कितीही असू शकतो. पण तो त्या बॅचमध्ये टॉपर असल्यामुळे त्याला 100 पर्सेंटाइल म्हणतात. याचा अर्थ असा नव्हे की 100 टक्के मार्क मिळालेत, असं आयुक्त सरदेसाई म्हणाले.

MHT-CET मध्ये अनियमितता झाल्याचादावा सरदेसाई यांनी फेटाळून लावला आहे.सोशल मीडियावर जे दावे करण्यात येत आहेत, ते दिशाभूल करणारे असल्याचं स्पष्टीकरण सरदेसाई यांनी दिलं. त्यामध्ये काहीही तथ्य नाही, असंही ते म्हणाले.  या दाव्यांबद्दल  CET सेलकडून  आझाद मैदान पोलीस ठाण्यात तक्रार दाखल करण्यात आल्याची माहितीदेखील समोर आली आहे. तसेच पोलीस, सायबर विभागाकडे चौकशीची मागणीही करण्यात आली आहे.