Mira Bhayandar : मीरा-भाईंदरमधील इमारतीत शिरला बिबट्या, हल्ल्यात तिघे जखमी

मीरा-भाईंदरमध्ये इमारतीत बिबट्याचा वावर

मुंबईतून एक धक्कादायक बातमी समोर आली आहे. मुंबईपासून हाकेच्या अंतरावर असलेल्या मीरा-भाईंदरमध्ये बिबट्याची दहशत पसरली आहे. मीरा-भाईंदरमधील तलाव रोड परिसरातील एका इमारतीमध्ये बिबच्या शिरला असून त्याच्या हल्ल्यात आत्तापर्यंत 3 जण जखमी झाल्याची माहिती समोर आली आहे. अग्निशमन दलाचे जवान आणि पोलीस घटनास्थळी दाखल झाले असून त्या बिबट्याा जेरबंद करण्याचे प्रयत्न सुरू आहेत. बिबट्याच्या हल्ल्यात एकाच कुटुंबातील तिघे जण जखमी झाले असून त्यांच्यावर नजीकच्या रुग्णालयात उपचार सुरू असल्याची देखील माहिती समोर आली आहे.आजूबाजूच्या नागरिकांना सतर्क राहण्याचे आवाहनही करण्यात आलं आहे.

इमारतीत बिबट्याचा वावर, तिघे जखमी

मिळालेल्या माहितीनुसार, आज सकाळी मीरा-भाईंदरच्या तलाव रोड परिसरातील पारिजात नावाच्या बिल्डींगमध्ये हा बिबट्या शिरला. त्या इमारतीच्या आवारात बिबट्याचा वावर असल्याचे आढळून आलं.

मीरा-भाईंदरच्या बीपी रोड मागच्या तलावरोड परिसरातील साईबाबा हॉस्पिटलच्या शेजारी असलेल्या पारिजात इमारतीत आज सकाळी 8 च्या सुमारास हा बिबट्या दिसला. तेथील एका घरात हा बिबट्या थेट घुसला, तेव्हा घरात 4 माणसं होती. तिथे घरात 25 वर्षांची एक तरूणी आणि काही पुरूष होते.  त्या घरात शिरलेल्या बिबट्याने सर्वांवर हल्ला चढवला. त्यांचे आवाज, आरडाओरडा ऐकून आजूबाजूच्या लोकांना ही घटना समजली.

त्यांनी तातडीने पोलिसांना व अग्निशमन दलाला फोन करून बिबट्या शिरल्याची, त्याच्या हल्ल्याची माहिती दिली.  त्यानंतर पोलीस व अग्निशमन दलाचे जवान तातडीने पारिजात इमारतीजवळ दाखल झाले. या हल्ल्यात तिघे जखमी झाले होते, त्यांना तातडीने नजीकच्या रुग्णालयात उपचारांसाठी दाखल करण्यात आलं. या हल्ल्यात 25 वर्षांची तरूणी जबर जखमी झाल्याची माहिती समोर आली आहे. तिच्यावर साईबाब हॉस्पिटलमध्ये उपचार सुरू आहेत.

रूममध्ये बंद केला बिबट्या

वनविभागाचे अधिकारी घटनास्थळी येण्यास निघाले आहेत. मात्र घटनास्थली नागरिकांची, बघ्यांची मोठी गर्दी झाली आहे. अग्निशमन दलाचे जवान तसेच पोलीस घटनास्थळी असून  त्या बिबट्याला एका रूममध्ये बंद करून ठेवण्यात आलं असून त्याला पकडण्याचे प्रयत्न सुरू आहेत.