फोन आला, फाईल डाउनलोड केली अन् मग जे घडलं…; टाटा पॉवरच्या नावाखाली मुंबईत हायटेक दरोडा

गेल्या काही दिवसांपासून सायबर गुन्ह्यात सातत्याने वाढ होत आहे. सायबर भामट्यांनी आता सुशिक्षित आणि तांत्रिक ज्ञान असलेल्या नागरिकांना लक्ष्य करण्यास सुरुवात केली आहे. सांताक्रूझ येथील एका ७० वर्षीय निवृत्त आयटी व्यावसायिकाला टाटा पॉवरचे अधिकारी असल्याचे भासवून तब्बल २.५ लाख रुपयांचा गंडा घातल्याची धक्कादायक घटना समोर आली आहे. याप्रकरणी वांद्रे येथील सायबर पोलीस ठाण्यात गुन्हा दाखल करण्यात आला आहे.

नेमकी घटना काय?

तक्रारदाराने दिलेल्या तक्रारीनुसार, ३ एप्रिलला तक्रारदाराने आपल्या वीज कनेक्शनमधील नाव बदलण्यासाठी टाटा पॉवरकडे अर्ज केला होता. यानंतर ६ एप्रिलला त्यांना नाव बदलण्याची प्रक्रिया पूर्ण झाल्याचा अधिकृत संदेशही मिळाला. त्याचवेळी १४ एप्रिलला एका अज्ञात व्यक्तीचा व्हॉट्सअॅप कॉल आला. समोरच्या व्यक्तीने आपण टाटा पॉवरमधून बोलत असल्याचे सांगितले. यानंतर नवीन नावाच्या अपडेटसाठी e-KYC प्रक्रिया पूर्ण करणे अनिवार्य असल्याचे सांगितले.

फसवणूक करणाऱ्या व्यक्तीकडे तक्रारदाराचा ग्राहक क्रमांक (Consumer Number) आणि घराचा पत्ता अशी अत्यंत वैयक्तिक आणि अचूक माहिती होती. यामुळे तक्रारदाराला समोरची व्यक्ती खरं बोलत असल्याचे वाटले. त्यांनी कोणताही संशय घेतला नाही.

यानंतर आरोपीने तक्रारदाराला एका लिंकवरून बनावट APK फाईल डाउनलोड करण्यास भाग पाडले. तक्रारदाराने ती फाईल इन्स्टॉल करताच, आरोपीने त्यांच्या फोनचा ताबा मिळवला. यानंतर आरोपीने केवळ बँक खात्यातील शिल्लक रक्कमच काढली नाही, तर तक्रारदाराच्या नावावर एक तात्काळ कर्ज देखील मंजूर करून घेतले. अशा प्रकारे एकूण २.५ लाख रुपये लंपास करण्यात आले. यानतंर पोलीस तपासात असे समोर आले आहे की, फसवणुकीच्या या रक्कमेचा मोठा हिस्सा आरोपीने स्वतःचे क्रेडिट कार्ड बिल भरण्यासाठी वापरला. सध्या पोलीस या आरोपीचा शोध घेत आहेत.

सायबर पोलिसांचा इशारा

दरम्यान सायबर पोलिसांच्या मते सध्या डेटा चोरीच्या माध्यमातून लोकांची वैयक्तिक माहिती मिळवून अशा प्रकारचे गुन्हे केले जात आहेत. कोणतीही अधिकृत संस्था व्हॉट्सअॅप कॉलवर e-KYC करत नाही किंवा कोणतीही फाईल इन्स्टॉल करण्यास सांगत नाही. त्यामुळे नागरिकांनी सावधगिरी बाळगावी, असे आवाहन पोलिसांनी केले आहे.