डोंबिवली डॉक्टर-नर्स मारहाण प्रकरणात मोठी घडामोड; नगरसेवक रमेश म्हात्रेंसह चौघांचा जामीन रद्द
Ramesh Mhatre News: डोंबिवली शास्त्रीनगर हॉस्पिटल डॉक्टर-नर्स मारहाण प्रकरणी नगरसेवक रमेश म्हात्रेंसह चौघांचा जामीन रद्द केला आहे. यामुळे त्यांच्या अडचणीत वाढ झाली आहे.

डोंबिवली शास्त्रीनगर हॉस्पिटल डॉक्टर-नर्स मारहाण प्रकरणात मोठी घडामोड समोर आली आहे. डॉक्टर मारहाण प्रकरणात नगरसेवक रमेश म्हात्रेंसह चौघांचा जामीन रद्द करण्यात आला आहे. कोर्टात हजर होताच त्यांना आधारवाडी कारागृहात रवानगी करण्यात आली आहे. सुप्रीम कोर्टाने जामीन रद्द केल्यानंतर नगरसेवक रमेश म्हात्रे आणि तीन साथीदार आज कल्याण कोर्टात हजर झाले होते. न्यायाधीश संतोष आगे यांनी चौघांना न्यायालयीन कोठडी सुनावली आहे. कोर्टाच्या आदेशानंतर पोलिसांनी चौघांची आधारवाडी कारागृहात रवानगी करण्यात आली आहे.
सर्वोच्च न्यायालयाने डोंबिवली येथील महानगरपालिकेच्या रुग्णालयात डॉक्टर आणि कर्मचाऱ्यांवर हल्ला केल्याचा आरोप असलेल्या शिवसेना नगरसेवक रमेश म्हात्रे यांना जामीन देणारा मुंबई उच्च न्यायालयाचा आदेश रद्द केला होता. न्यायमूर्ती विक्रम नाथ आणि न्यायमूर्ती संदीप मेहता यांच्या खंडपीठाने म्हात्रे यांना तीन दिवसांच्या आत आत्मसमर्पण करण्याचे निर्देश दिले होते.
हिंसाचार किंवा धमक्यांच्या भीतीखाली वैद्यकीय व्यावसायिकांनी स्वतंत्रपणे काम करावे अशी अपेक्षा करता येणार नाही, असे न्यायालयाने म्हटले होते. २८ सप्टेंबर रोजी दिलेल्या सविस्तर निकालात मुंबई उच्च न्यायालयाचा एक आदेश रद्द करून न्यायमूर्ती विक्रम नाथ आणि संदीप मेहता यांच्या खंडपीठाने म्हात्रे आणि त्यांच्या साथीदारांना ५ ऑक्टोबरपर्यंत सत्र न्यायालयात आत्मसमर्पण करण्याचे निर्देश दिले होते. या प्रकरणात साक्ष देण्याची शक्यता असलेल्या डॉक्टर आणि रुग्णालयातील कर्मचाऱ्यांच्या संरक्षणाची खात्री सत्र न्यायालयाने करावी, असेही न्यायालयाने म्हटले आहे.
मिळालेल्या माहितीनुसार, हे प्रकरण डोंबिवलीतील शास्त्री नगर म्युनिसिपल हॉस्पिटलमध्ये ६ जुलै रोजी घडलेल्या एका घटनेशी संबंधित आहे. चार आरोपींनी लेबर वॉर्डमध्ये कर्तव्यावर असलेल्या एका महिला डॉक्टरसह तीन डॉक्टरांना मारहाण करून शिवीगाळ केल्याचा आरोप आहे. या घटनेत महेश म्हात्रे यांच्यासह इतर आरोपींमध्ये रमेश लक्ष्मण पवार, प्रमोद उर्फ प्रकाश उद्धव निकम आणि अक्षय शरद करांडे यांचा समावेश आहे. आता या सर्व आरोंपींची तुरुंगात रवानगी करण्यात आली आहे.