NCP National Executive List: राष्ट्रवादीच्या राष्ट्रीय कार्यकारिणीतून कुणाला डच्चू? कुणाला लागणार लॉटरी? या दोन बड्या नेत्यांची धाकधूक वाढली

NCP National Executive List: राष्ट्रवादी काँग्रेस पक्षाच्या राष्ट्रीय कार्यकारिणीवरून मोठा गोंधळ उडाला होता. प्रदेशाध्यक्ष सुनील तटकरे आणि प्रफुल पटेल यांच्या नावासमोर पदाचा उल्लेख नसल्याने चर्चांना उधाण आले होते. त्यानंतर या दोघांनी ज्येष्ठ नेते शरद पवार यांची भेट घेतली. त्यामुळे गोंधळात अजून भर पडली. राष्ट्रवादीत काहीच आलबेल नसल्याचा दावा करण्यात आला. तर राष्ट्रवादी आता नवीन कार्यकारिणीची यादी लवकरच निवडणूक आयोगाला देणार आहे. त्यात दोन नेत्यांना डच्चू मिळणार असल्याचे समजते. तर काहींना लॉटरी लागण्याची शक्यता वर्तवली जात आहे.

नवीन कार्यकारिणीची यादी निवडणूक आयोगाला

राष्ट्रवादीच्या नवीन कार्यकारिणीची यादी निवडणूक आयोगाला लवकरच दिली जाणार आहे. कार्यकारिणीमध्ये सुनील तटकरे आणि प्रफुल पाटेल यांच्या पदाचा उल्लेख न केल्याने नाराजीचा सूर होता. नवख्या लोकांना कार्यकारणीत स्थान दिल्याने तटकरे आणि पटेल यांची नाराजी होती. त्यांनी या नवीन लोकांऐवजी पक्षासाठी राबलेल्या जुन्या चेहऱ्यांना संधी देण्याची मागणी केल्याचे समजते. त्यानुसार राष्ट्रवादीच्या कार्यकारिणीत बदल करून नवीन यादी निवडणूक आयोगाकडे सादर करण्यात येणार असल्याची माहिती सूत्रांनी दिली आहे.

कुणाला मिळणार डच्चू?

या महिन्याच्या दुसर्‍या आठवड्यात राष्ट्रवादी काँग्रेसच्या राष्ट्रीय कार्यकारिणीची अंतिम यादी सोशल मीडियावर व्हायरल झाली होती. त्यात पक्षाचे ज्येष्ठ नेते प्रफुल पटेल आणि सुनील तटकरे, दिलीप वळसे पाटील यांच्या नावाचा समावेश नसल्याने चर्चेला उधाण आले होते. तर नंतर ही तांत्रिक चूक असल्याचे सांगत या वादावर पांघरूण घालण्यात आले. या कार्यकारिणीत सुनेत्रा पवार राष्ट्रीय अध्यक्ष, पार्थ पवार महासचिव, तर जय पवार यांना राष्ट्रीय सचिव असा उल्लेख करण्यात आला होता. या कार्यकारिणीवर तटकरे आणि पटेल हे नाराज होते. या कार्यकारिणीत काही नवीन चेहऱ्यांना स्थान दिल्याने ते नाराज झाल्याचे समोर आले होते. आतासुबोध मोहिते आणि प्रजापती यांनाही कार्यकारणीतून वगळले जाण्याची शक्यता सूत्रांनी व्यक्त केली आहे.

कुणाला मिळणार संधी?

सना मलिक यांच्याऐवजी हसन मुश्रीफ यांना कार्यकारिणीत स्थान देण्याची शक्यता वर्तवली जात आहे. तर त्याचबरोबर माजी मंत्री धनंजय मुंडे यांनाही संधी मिळण्याची शक्यता वर्तवली जात आहे. आता नवीन कार्यकारिणी समोर आल्यानंतर कुणाला संधी दिली आणि कुणाला डच्चू देण्यात आला हे लवकरच समोर येईल. पण तोपर्यंत या मुद्यावरून वातावरण तापण्याची शक्यता आहे.