प्रसिद्ध रिलस्टार समुद्रात बेपत्ता, गणपती विसर्जनावेळी भयंकर घडलं, खोल पाण्यात जाताच…

नालासोपाऱ्यातील कळंब समुद्र किनाऱ्यावरुन एक मोठी आणि चिंताजनक बातमी समोर आली आहे. नालासोपा-याच्या कळंब समुद्र किनाऱ्यावर पाण्यात उतरलेला प्रसिद्ध रील क्रिएटर कृष्णा विश्वकर्मा समुद्रात बेपत्ता झाला आहे. शुक्रवारी दुपारी साडे बाराच्या सुमारास ही हिटना घडली असून, आज रात्रीपर्यंत सुद्धा त्यांचा पत्ता लागला नाही. वसई विरार महापालिका अग्निशमन दलाचे जवान आणि पोलिसांनी आज रात्री उशिरा पर्यंत शोध मोहीम राबविली मात्र शोध लागला नाही.

नेमकं काय घडलं?

शुक्रवारी दुपारी सर्वत्र अनंत चतुर्दशीनिमित्त गणपती विसर्जन सुरु होते. याचवेळी कृष्णा विश्वकर्मा हा प्रसिद्ध रील स्टार स्वतःच्या परिवार आणि कुटुंबिय मिंत्रांसोबत नालासोपाऱ्यातील कळंब समुद्रकिनारी पोहोचला होता. कृष्णा नालासोपारामधील संतोष धुन परिसरातील दुर्गा माता मंदिराजवळील गुरुकृपा अपार्टमेंटमध्ये वास्तव्य करत असल्याचं सांगितलं जातंय. सोशल मीडियावर रील आणि व्हिडिओ बनवत असल्याने कृष्णा सदरील परिसरामध्ये प्रचंड लोकप्रिय होता.

दरम्यान, नेमकी घटना काय घडली हे सांगताना परिवारातील काही सदस्यांनी असंही सांगितल्याची माहिती समोर आली आहे की, कृष्णा अशा ठिकाणी पाण्यात उतरला जिथे पाणी वरुन तर कमी वाटत होतं पण व्हिडिओ बनवण्यासाठी पाण्यात उतरणं कृष्णाला महागात पडलं. रिल बनवण्याच्या नादात तो खोल पाण्यामध्ये उतरला आणि पुढे सरकत गेला. हळूहळू तो दिसेनासा झाला. परिवाराने शंका उपस्थित केली की, जिथे तो पाण्यामध्ये उतरला तिथे खोल खड्डा असावा ज्यामुळे त्याचा पाण्याचा अंदाज चुकला असावा, परंतू कृष्णा नेमका कुठे गायब झाला आणि त्याच्या गायब होण्यामागचे नेमके खरे कारण अद्याप समोर आलेले नाही.

तो खोल पाण्यात कसा पोहोचला. त्याच्यासोबत नेमकं काय घडलं या संपूर्ण घटनेची अधिकृत माहिती आणि स्पष्टीकरण अजून पुढे आलेलं नाही. दरम्यान, कृष्णा गायब झाल्यानंतर घरच्यांनी लगेचच आसपासच्या लोकांना याची माहिती दिली. त्यानंतर त्यांनीही धावपळ केली परंतू पाण्याची गती आणि एकूण स्थिती पाहून कोणीच पाण्यामध्ये उतरुन त्याला शोधण्याची हिंमत केली नाही.