फ्रिजमध्ये रक्ताचा साठा, किचनमध्ये झुरळं-माशा अन् उंदरांची विष्ठा; मुंबईतील प्रसिद्ध हॉटेलचा परवाना निलंबित

मुंबईतील प्रसिद्ध Kyani & Co. वर अन्न व औषध प्रशासनाने मोठी कारवाई केली आहे. एफडीए प्रमुख तुकाराम मुंडे यांच्या नेतृत्वाखालील पथकाने केलेल्या तपासणीत मुंबईतील ऐतिहासिक इराणी कॅफे आणि रेस्टॉरंट ‘क्यानी अँड कंपनी’च्या अन्न तयार करण्याच्या आणि साठवणुकीच्या जागेत उंदराची विष्ठा, जिवंत माश्या आणि मेलेली झुरळे आढळली. यानंतर महाराष्ट्र अन्न आणि औषध प्रशासनाने त्याचा भारतीय अन्न सुरक्षा आणि मानक प्राधिकरण परवाना निलंबित केला आहे.

क्यानी अँड कंपनीच्या परिसरात मांजरेही आढळून आली. तसेच एका रेफ्रिजरेटरमध्ये मोठ्या प्रमाणात रक्त साचले होते. काळबादेवी येथील Kyani & Co. ची 27 सप्टेंबर रोजी FDAकडून तपासणी करण्यात आली आहे. तपासणीदरम्यान अन्न तयार करण्याच्या आणि साठवणूक क्षेत्रात गंभीर त्रुटी आढळल्याचा FDA ने दावा केला आहे. अन्न तयार करण्याच्या ठिकाणी मांजर आणि उंदरांची विष्ठा आढळल्याची FDA ने माहिती दिली आहे.

क्यानी अँड कंपनीत जिवंत माश्या आणि मृत झुरळे आढळल्याचाही एफडीएने दावा केला आहे. रेफ्रिजरेटरमध्ये मोठ्या प्रमाणात रक्त साचलेले आढळल्याची नोंद अहवालात करण्यात आली आहे. प्रक्रिया विभागात उघडे सांडपाण्याचे मॅनहोल आढळल्याचीही FDA ने माहिती दिली आहे. अन्नपदार्थ थेट जमिनीवर ठेवण्यात आल्याचे तपासणीत आढळले आहे. कच्चे पीठ छापील वर्तमानपत्राने झाकल्याचेही निदर्शनास आले आहे. कर्मचाऱ्यांकडून आवश्यक स्वच्छता आणि किट्सचा वापर होत नसल्याचे आढळले.

कच्चे आणि तयार अन्नपदार्थ योग्य पद्धतीने वेगळे ठेवले नसल्याचे FDAच्या तपासणीत समोर आले आहे. यामुळे गंभीर अन्न सुरक्षा आणि स्वच्छता त्रुटींमुळे ग्राहकांच्या आरोग्याला तात्काळ धोका निर्माण होण्याची शक्यता आहे. या कारणामुळे Kyani & Co. चा FSSAI परवाना तात्काळ निलंबित करण्यात आला आहे. तसेच अन्नपदार्थांची खरेदी, उत्पादन, प्रक्रिया, साठवणूक, विक्री आणि वितरण तात्काळ बंद करण्याचे निर्देश देण्यात आले आहेत.