लाखोंचं सोनं-चांदी, कोट्यवधींचे मुंबई आणि पुण्यात फ्लॅट, अनिल देसाई यांच्या संपत्तीची माहिती समोर
अनिल देसाई यांनी निवडणूक आयोगाकडे सादर केलेल्या प्रतिज्ञापत्रकानुसार, देसाई यांच्या स्वत:कडे सध्याच्या घडीला 75 हजार रोख रक्कम आहे. तर त्यांच्या पत्नीकडे 1 लाख रुपये रोख रक्कम आहे. अनिल देसाई यांच्यावर कोणताही फौजदारी गुन्हा दाखल नाही.
शिवसेना ठाकरे गटाचे दक्षिण मध्य मुंबई लोकसभा मतदारसंघाचे उमेदवार अनिल देसाई यांनी आज लोकसभा निवडणुकीसाठी उमेदवारी अर्ज दाखल केला आहे. अनिल देसाई यांनी आपल्या उमेदवारी अर्जासोबत प्रतिज्ञापत्राच्या माध्यमातून आपल्या संपत्तीची माहिती केंद्रीय निवडणूक आयोगाला दिली आहे. या प्रतिज्ञापत्रात अनिल देसाई यांच्या पत्नीच्या नावावर असणाऱ्या संपत्तीची देखील माहिती देण्यात आली आहे. तसेच अनिल देसाई आणि त्यांच्या पत्नीच्या नावावर किती कोटींचं कर्ज आहे, याबाबतही सविस्तर माहिती देण्यात आली आहे. अनिल देसाई हे शिवसेना ठाकरे गटाचे प्रमुख उद्धव ठाकरे यांचे अतिशय निकटवर्तीय मानले जातात. देसाई यांनी आपल्याकडे सध्या किती रोख रक्कम आहे यापासून ते त्यांच्या नावावर असलेली स्थावर मालमत्ता याविषयी सविस्तर माहिती निवडणूक आयोगाला दिली आहे.
अनिल देसाई यांनी निवडणूक आयोगाकडे सादर केलेल्या प्रतिज्ञापत्रकानुसार, देसाई यांच्या स्वत:कडे सध्याच्या घडीला 75 हजार रोख रक्कम आहे. तर त्यांच्या पत्नीकडे 1 लाख रुपये रोख रक्कम आहे. अनिल देसाई यांच्यावर कोणताही फौजदारी गुन्हा दाखल नाही. अनिल देसाई यांच्याकडे 530 ग्रॅम सोनं आणि 2 हजार ग्रॅम चांदी आहे. या दोघांची किंमत 36 लाख 89 हजार 800 रुपये इतकी आहे.
अनिल देसाई यांच्या पत्नीकडे 2300 ग्रॅम सोनं आणि 5 ग्रॅम चांदी आहे. या दोघांची मिळून किंमत ही 1 कोटी 57 लाख 18 हजार रुपये इतकी आहे. अनिल देसाई यांच्या स्वतः कडे एकूण 3 कोटी 85 लाख 71 हजार 323 रुपये रक्कम आहे. तर पत्नीच्या नावे 2 कोटी 96 लाख 89 हजार 326 रुपये रक्कम आहे.
स्थावर मालमत्ता किती?
अनिल देसाईंच्या नावे असलेली एकूण स्थावर मालमत्ता ही 5 कोटी 68 लाख रुपये इतकी आहे. तर पत्नीच्या नावे असलेली एकूण स्थावर मालमत्ता ही 9 कोटी 12 लाख रुपये आहे. यामध्ये प्रामुख्याने ब्रीच कँडी येथील राहत्या घराचा समावेश आहे. हे घर अनिल देसाई आणि त्यांच्या पत्नीच्या नावावर आहे. या घराची किंमत ही 5 कोटी 68 लाख रुपये इतकी आहे.
अनिल देसाई यांच्या पत्नीच्या नावे असलेला मुंबईतील फ्लॅटची किंमत ही 2 कोटी 61 लाख रुपये इतकी आहे. तसेच त्यांच्या पत्नीच्या नावे पुण्यात असलेल्या फ्लॅटची किंमत ही 81 लाख 64 हजार रुपये इतकी आहे. अनिल देसाईंवर 76 लाख रुपयांचं कर्ज आहे. तर त्यांच्या पत्नीच्या नावावर 1 कोटी 48 लाख रुपयांचं कर्ज आहे.