लोकसभा निवडणूक २०२४

2024च्या लोकसभा निवडणुकीचं रणशिंग फुंकलं गेलं आहे. 17व्या लोकसभेचा कार्यकाळ 16 जून 2024 रोजी संपणार आहे. अशा परिस्थितीत निवडणूक आयोगाने निवडणुकीचा कार्यक्रम जाहीर केला आहे. देशभरात सात टप्प्यात मतदान होणार आहे. पहिल्या टप्प्यात 19 एप्रिल, दुसऱ्या टप्प्यात 26 एप्रिल, तिसऱ्या टप्प्यात 7 मे, चौथ्या टप्प्यात 13 मे, पाचव्या टप्प्यात 20 मे, सहाव्या टप्प्यात 25 मे आणि सातव्या टप्प्यात 1 जून रोजी मतदान होणार आहे. निवडणुकीचा निकाल 4 जून रोजी लागणार आहे. त्यानंतर देशात नवीन सरकार स्थापन होईल. लोकसभेच्या शेवटच्या सार्वत्रिक निवडणुका एप्रिल आणि मे 2019 मध्ये झाल्या होत्या. केंद्रात स्पष्ट बहुमत असलेले स्थिर सरकार असेल तर दर पाच वर्षांनी लोकसभेच्या सार्वत्रिक निवडणुका होतात. भारतीय राज्यघटनेच्या अनुच्छेद 83 नुसार लोकसभेच्या निवडणुका दर पाच वर्षांनी एकदा घेतल्या जातात. देशातील एक पात्र मतदार हा भारतीय नागरिक असावा आणि त्याने/तिने वयाची 18 वर्षे पूर्ण केली असल्यास मतदान करू शकतो. मात्र, त्याला मतदान करण्यासाठी मतदार यादीत नाव नोंदवावे लागेल. यासह, भारत निवडणूक आयोगाने जारी केलेले वैध मतदार ओळखपत्र असणे आवश्यक आहे. 2019 मध्ये झालेल्या गेल्या लोकसभा निवडणुकीत भाजपला प्रचंड बहुमत मिळाले होते. देशात लोकसभेच्या एकूण 543 जागा आहेत आणि बहुमतासाठी 272 जागा आवश्यक आहेत.