केंद्रीय मंत्रिमंडळात शिंदे गटाच्या खासदारांना स्थान मिळणार?, गजानन किर्तीकर यांचं म्हणणं काय

मुंबई : गजानन किर्तीकर हे शिंदे गटाचे खासदार आहेत. केंद्रीय मंत्रिमंडळात विस्ताराच्या चर्चा होत आहेत. शिंदे गटासोबतच्या आघाडीत भाजपने एकनाथ शिंदे यांना मुख्यमंत्री केले. आता केंद्राच्या मंत्रिमंडळ विस्तारात शिंदे गटाच्या खासदारांचा समावेश केला जातो काय, हे पाहणं महत्त्वाचं ठरणार आहे. केंद्रीय मंत्रिमंडळात शिंदे गटाच्या खासदारांना भाजप नक्कीच स्थान देईल, असा मला विश्वास आहे. असं मत गजानन किर्तीकर यांनी व्यक्त केलं.

गजानन किर्तीकर म्हणाले, मला केंद्रात मंत्रिपद मिळेल, म्हणूनच मी शिंदे गटात सामील झालो नाही. आम्ही 2019 मध्ये भाजपसोबत निवडणूक लढवली होती. भाजपसोबत सरकार बनवायला हवे होते, असे आम्ही मानतो. शिवसेनेसाठी राष्ट्रवादी घातक आहे.

संजय राऊत यांची अनेक विधाने आहेत. 16 जणांना सर्वोच्च न्यायालयातून अपात्र ठरवणार असंही संजय राऊत म्हणाले होते. शिवसेनेचे चिन्ह जाणार नाही, असंही त्यांनी म्हटलं होतं. पण, त्यापैकी काहीही झालेलं नाही. दोन शिवसेना असताना देवेंद्र फडणवीस – एकनाथ शिंदे एकत्र काम करू शकत नाहीत, असे म्हटले होते. पण असे काही झाले नाही, असा टोला संजय राऊत यांना गजानन किर्तीकर यांना लगावला.

शिंदे – फडणवीस सरकार मंत्रिमंडळ विस्तार होणार आहे. विस्तार तर होणारच होता. आधी दोघांनी मंत्रिमंडळाची शपथ घेतली. नंतर 9 मंत्री झाले. आता मुख्यमंत्री आणि उपमुख्यमंत्र्यांकडे अतिरिक्त खाते विस्तारणार आहेत, असंही गजानन किर्तीकर म्हणाले.

संजय राऊत आणि नारायण राणे यांच्यातील वादाला माध्यमांमध्ये मोठ्या प्रमाणावर प्रसिद्धी दिली जात आहे. सर्वसामान्यांना त्यात इंटरेस्ट नाही. लोक याकडे केवळ मनोरंजन म्हणून पाहत आहेत. अशी टीकाही गजानन किर्तीकर यांनी केली.