“कर्नाटक सरकारला अधिकृतरित्या कळवून दौरा करणार”; ‘हे’ मंत्री सीमाभागातील मराठी भाषिकांची परिस्थिती जाणून घेणार

नागपूरः ज्या प्रमाणे महाराष्ट्राचे हिवाळी अधिवेशन सुरू आहे, त्याच प्रमाणे कर्नाटकमध्येही अधिवेशन सुरू आहे. बेळगावमध्ये सुरू असणाऱ्या हिवाळी अधिवेशनाआधी महाराष्ट्र आणि कर्नाटकच्या मुख्यमंत्र्यांची केंद्रीय गृहमंत्री अमित शहा यांच्याबरोबर बैठक झाली होती. त्या बैठकीत सीमावादावर चर्चा होऊन त्यावर सामोपचाराने तोडगा काढण्याचेही संकेत देण्यात आले होते. तरीही बसवराज बोम्मई यांनी त्या बैठकीनंतर बोम्मई यांनी सीमाभागातील मराठी भाषिकांच्या भावना दुखवणारी,चिथावणीखोर वक्तव्य केली आहेत.

त्यामुळे आता महाराष्ट्रातील मंत्री शंभूराज देसाई, मंत्री चंद्रकांत पाटील हे दोन्ही मंत्री कर्नाटक सरकारला अधिकृतरित्या कळवून बेळगाव दौरा करणार आहेत.

त्यावेळी बेळगावमध्ये राहणाऱ्या आणि सीमाभागातील नागरिकांची दुःख, कर्नाटक सरकारकडून केला जाणार अन्याय, अत्याचार, बेळगावमधील महाराष्ट्र एकीकरण समितीचे पदाधिकारी, आजी माजी लोकप्रतिनिधी यांची शंभूराज देसाई आणि चंद्रकांत पाटील भेट घेणार आहेत.

शिंदे गटाचे आमदार आणि मंत्री शंभूराज देसाई यांनी सांगितले की, हिवाळी अधिवेशन संपल्यानंतर मंत्री चंद्रकांत पाटील आणि आपण दोघंही बेळगाव दौरा करणार आहे.

यावेळी बेळगावमधील मराठी भाषिकांची भेट घेऊन त्यांच्या भावना समाजून घेणार आहोत. हा दौरा करताना कार्यालयीन पद्धतीने कर्नाटक सरकारला माहिती देऊनच हा दौरा केला जाणार आहे.

कर्नाटकचे मुख्यमंत्री बसवराज बोम्मई यांच्याकडून सातत्याने चिथावणी देणारी वक्तव्यं केली जात असून, वादग्रस्त ट्विटही केली जात आहेत.

त्यामुळे या विषयावर आणि सीमावादाविषयी मराठी भाषिकांची भूमिका मांडण्यासाठी ते कर्नाटक सरकारमधील मंत्र्याचीही भेट घेणार आहेत.

बेळगाव आणि सीमाभागातील वेगवेगळ्या ज्या संघटना आहेत. त्यांचे जे पदाधिकारी आहेत. मराठी भाषिक आहे. महाराष्ट्र एकीकरण समिती, त्यांचे पदाधिकारी आणि आजी माजी लोकप्रतिनिधी यांची भेट घेऊन त्यांची नेमकी काय भूमिका आहे. ते जाणून घेण्याचा प्रयत्न केला जाणार आहे.

गेल्या काही दिवसांपासून बेळगाव प्रशासनाकडून महाराष्ट्रातील मंत्री, नेत्यांना बेळगाव प्रवेश बंदी घालण्यात आली होती. पण आता मात्र कार्यालयीन पद्धतीने मुख्यमंत्री कार्यालयाला कळवूनच महाराष्ट्रातील दोन मंत्री सीमाभागाचा दौरा करणार असल्याने सीमाभागातील नागरिकांना आता उत्सुकता लागली आहे.