क्राईम कॅपिटलकडून सुरक्षित शहराकडे नागपूरची वाटचाल!, फेब्रुवारी महिन्यात खुनाची एकही घटना नाही
नागपुरात फेब्रुवारी महिना खुनाच्या घटनेविना गेला. याबद्दल नागपूर पोलीस आयुक्तांनी नागपूरकरांचे आभार मानले. गुन्हेगार आणि अवैध धंद्यांविरुद्ध पोलिसांनी धडक मोहीम राबवल्याचे हे यश असल्याचे आयुक्त अमितेश कुमार म्हणाले. नागपुरात दरवर्षी खुनाच्या सुमारे शंभर घटना घडतात.
नागपूर : हत्येच्या घटनांसाठी कुप्रसिद्ध असलेल्या उपराजधानी नागपुरात (Nagpur City ) गेल्या फेब्रुवारी महिन्यात हत्येचा एकही गुन्हा दाखल नाही. नागपूरच्या इतिहासात पहिल्यांदाच महिन्याभरात एकही हत्या झालेली नाही. नागपूर शहर हे क्राईम कॅपिटल (Crime Capital) म्हणून ओळखलं जाते. महाराष्ट्र राज्याच्या उपराजधानीत शहर असलेलं नागपूर हत्यांसाठी कुप्रसिद्ध आहे. गेल्यावर्षी नॅशनल क्राईम रेकॉर्ड ब्युरोच्या ( National Crime Records Bureau) आकड्यांनुसार देशात सर्वाधिक हत्या होणाऱ्या शहरांच्या यादीत नागपूरचे नाव आघाडीवर होते. मात्र, याच नागपूर शहरात फेब्रुवारी महिन्यात एक सुद्धा हत्येचा गुन्हा दाखल झालेला नाही. ही नागपूरकर आणि पोलिसांसाठी दिलासादायक बातमी आहे.
कारवाईतून सुटलेल्यांवर नजर
गेल्या काही महिन्यांमध्ये नागपूर शहरात अनेक मोठी हत्याकांड घडली. ज्यामुळं नागपूर पोलिसांवर आणि त्यांच्या कार्यप्रणालीवर सुद्धा प्रश्न उपस्थित झाले होते. मात्र, नागपूर शहरांमध्ये फेब्रुवारी महिन्यामध्ये एकही हत्या न होण्यामागे पोलिसांनी केलेली विशेष उपाययोजना आणि जनतेच्या विश्वास संपादन करण्यात पोलिसांना यश, यामुळं हे शक्य झाले असल्याची प्रतिक्रिया नागपूरचे पोलीस आयुक्त अमितेश कुमार यांनी दिलीय. कारवाईतून सुटलेल्यांनाही लवकरच जेलची हवा दाखविणार असल्याचा इशारा आयुक्तांनी दिली.
पोलिसांचा धाक निर्माण झाला
पोलीस आयुक्त म्हणाले, खुनाच्या घटना रोखणे ही प्राथमिकता होती. छोट्या-मोठ्या गुन्ह्यावरून आरोपींवर कारवाई केली. एमपीडीएच्या विक्रमी कारवाया केल्याने आरोपींमध्ये धाक निर्माण झाला. काही आरोपी सुटले असतील तर त्यांनाही जेलची हवा दाखविणार असल्याचं पोलीस आयुक्त म्हणाले. दारुचा व्यापारी अशोक वंजानीविरुद्ध हप्तावसुलीचा गुन्हा दाखल करण्यात आला. वंजानीला तडीपार करण्याची कारवाई सुरू आहे. पप्पू अवस्थी व निषेध वासनिक टोळीविरुद्ध मकोमाची कारवाई केली असल्याचंही आयुक्त यांनी सांगितलं.
