छगन भुजबळ यांना घरातूनच कडवे आव्हान, राष्ट्रवादीच्या नेत्यांनीच केला विरोधात पॅनल, राजकारण तापलं
राष्ट्रवादीच्या स्थानिक नेत्यांनी छगन भुजबळ यांचे टेंशन वाढवलं आहे. बाजार समितीच्या निवडणुकीत विरोधी पॅनल करण्यात आल्यानं उलटसुलट प्रतिक्रिया उमटू लागल्या आहेत.
लासलगाव, नाशिक : राष्ट्रवादीचे ज्येष्ठ नेते, माजी मुख्यमंत्री छगन भुजबळ यांचं त्यांच्याच पदाढीकऱ्यांनी टेंशन वाढवलं आहे. भुजबळांच्या येवला लासलगाव विधानसभा मतदारसंघातील लासलगाव बाजार समितीची निवडणूक ऐन रंगात आली आहे. आशिया खंडातील कांद्याची अग्रसर बाजार पेठे म्हणून ओळख लासलगाव कृषी उत्पन्न बाजार समितीची ओळख आहे. 28 एप्रिल 2022 ला पंचवार्षिक निवडणूक होत आहे. ही निवडणूक बिनविरोध करण्यासाठी प्रयत्न सुरु आहे. ही निवडणूक बिनविरोध न झाल्यास पैशांचा खेळ होण्याची भीती माजी आमदार कल्याणराव पाटील यांनी व्यक्त केले आहे. यानंतर बाजार समितीच्या वर्तुळात खळबळ उडाली असून उलटसुलट चर्चा सुरू झाली आहे.
कांदा म्हटले की आपसूकच नाव येणार ते लासलगावचे. लासलगाव कृषी उत्पन्न बाजार समितीची कांदा, धान्य, भाजीपाला आणि जनावरे लिलावाची वार्षिक उलाढाल दोन हजार कोटींच्या जवळपास आहे. एकोणीस कोटीहून अधिकचे उत्पन्न मिळाले आहे. या लासलगाव बाजार समितीची पंचवार्षिक निवडणूक 28 एप्रिल 2022 होत आहे.
या अगोदर 20 एप्रिल रोजी माघारी होणार आहे. त्या अगोदर इच्छुक उमेदवारांनी बाजार समितीच्या कार्यक्षेत्रात येत असलेल्या 65 गावांमध्ये आपला प्रचार दौरा सुरू केला आहे. राष्ट्रवादीचे स्थानिक जयदत होळकर आणि पंढरीनाथ थोरे या दोन नेत्यांनी परस्पर विरोधी पॅनल तयार करण्याची लगबग सुरु केली आहे.
माजी आमदार आणि बाजार समितीचे माजी सभापती कल्याणराव पाटील यांनी बाजार समितीची निवडणूक बिनविरोध करण्यासाठी प्रयत्न सुरू केला आहे. मात्र, या प्रयत्नाला यश येत नसल्याचे दिसत असल्याने या निवडणुकीतून थांबण्याचा निर्णय घ्यावा लागणार असल्याचे सांगत यात मोठा पैसाचा खेळ होण्याची भीती व्यक्त केल्याने खळबळ उडाली आहे.
राष्ट्रवादीचे स्थानिक नेते आणि मुंबई कृषी उत्पन्न बाजार समिती चे संचालक जयदत होळकर यांच्या पॅनलला छगन भुजबळ यांचा पाठिंबा असणार आहे. त्यामुळे त्यांच्या विरोधी असलेला पॅनलचे नेतृत्व करणारे राष्ट्रवादीचे नेते पंढरीनाथ थोरे यांच्या पॅनलला पाठिंबा देणार असल्याचे माजी आमदार कल्याणराव पाटील म्हंटले आहे.
कल्याणराव पाटील यांनी केलेल्या व्यक्तव्यानंतर ही निवडणूक रंगतदार होणार असल्याचे चित्र यानिमित्ताने तयार झाले आहे. तर दुसरीकडे माजी उपमुख्यमंत्री तथा राष्ट्रवादी काँग्रेसचे ज्येष्ठ नेते छगन भुजबळ यांनी कल्याणराव पाटील यांच्या आरोपाचे खंडन करत निवडणुकीत थोडाफार खर्च येणारच असं म्हंटलं आहे.
छगन भुजबळ यांनी महाविकास आघाडीची मोट बांधण्याचे काम केले असले तरी काही राष्ट्रवादी कॉंग्रेसच्या पदाढीकऱ्यांनी भाजप साथ घेऊन पॅनल तयार करण्याच्या हालचाली सुरू केल्या आहे. त्यामुळे राष्ट्रवादी कॉंग्रेसच्या नेत्यांनीच भुजबळ यांचे टेंशन वाढल्याचे बोलले जात आहे.
