Navi Mumbai Metro : ठरलं! राज्यसभा निवडणुकीनंतर नवी मुंबईत मेट्रो धावणार?

प्रातिनिधिक छायाचित्र

Image Credit source: twitter

नवी मुंबई : नवी मुंबईकरांसाठी (Navi Mumbai) आनंदाची बातमी आहे. विविध कारणांमुळे गेल्या दहा वर्षांपासून रखडलेली मेट्रो (Metro) आता लवकरच धावण्याची शक्यता आहे. राज्यसभा निवडणुकीनंतर (Rajya Sabha elections) प्रवासी सेवा सुरू होणार असल्याची माहिती मिळत आहे. प्रवासी सेवा सुरू करण्यासाठी आवश्यक असलेल्या सर्व परवानग्या सिडकोला मिळाल्या आहेत. परवानग्या मिळाल्याने सिडकोकडून तयारीला वेग आला आहे. मात्र आता उद्घाटनामुळे मेट्रो सुरू करण्यास विलंब होत असल्याचे बोलले जात आहे. सध्या राज्यसभा निवडणुकीची रणधुमाळी सुरू आहे. राज्यातील प्रमुख नेते हे सध्या राज्यसभा निवडणुकीमध्ये व्यस्त आहेत. त्यामुळे उद्घाटनासाठी संबंधित मंत्र्यांच्या तारखा उपलब्ध होत नसल्याने मेट्रो प्रवास लांबणीवर पडल्याचे बोलले जात आहे. मात्र आता राज्यसभा निवडणुकीनंतर लगेच राज्य सरकारच्या वतीने मेट्रोचे उद्घाटन करण्यात येणार असल्याची माहिती समोर येत आहे.

महामेट्रोकडून वर्षभरात काम पूर्ण

नवी मुंबईतील दळणवळण व्यवस्था अधिक गतिमान व्हावी यासाठी सिडकोकडून पेंधर ते बेलापूरदरम्यान 2011 साली मेट्रोच्या कामाला सुरुवात करण्यात आली होती. मात्र त्यानंतर सातत्याने मेट्रो प्रकल्पाच्या उभारणीमध्ये अडथळे येत गेले. त्यामुळे मेट्रो प्रकल्प रखडला त्याच्या खर्चात देखील वाढ झाली. पुढे या प्रकल्पाची जबाबदारी महामेट्रोवर सोपवण्यात आली. महामेट्रोने प्रकल्पाची जबाबदारी घेतल्यानंतर अवघ्या एका वर्षात मेट्रो प्रकल्प उभारण्यात आला. प्रवासी वाहतुकीसाठी आवश्यक असणाऱ्या सर्व चाचण्या सिडकोने पूर्ण केल्या असून, त्यांना रेल्वे सुरक्षा मंडळाकडून नाहरकत प्रमाणपत्र देखील मिळाले आहे.

सिडकोकडून पाठपुरावा

मेट्रोच्या प्रवासी वाहतुकीसाठी आवश्यक असणाऱ्या सर्व परवानग्या सिडकोला मिळाल्या आहेत. मात्र आता उद्घाटनासाठी मेट्रोलचा प्रवास थांबला आहे. राज्यसभा निवडणुकीनंतर लगेचच उद्घाटन करण्यात येणार असून, नवी मुंबईत मेट्रो धावणार आहे. उद्घाटनासाठी मंत्र्यांची तारीख मिळावी यासाठी सिडकोकडून पाठपुरावा देखील सुरू असल्याची माहिती समोर येत आहे. राज्यसभेच्या निवडणुकीनंतर आता मेट्रोल मुहूर्त लागण्याची शक्यता आहे.