Sharad Pawar Health Update: शरद पवार ब्रीच कँडी रुग्णालयात दाखल, कशी आहे प्रकृती?

राष्ट्रवादी काँग्रेसचे ज्येष्ठ नेते शरद पवार यांची काही दिवसांपूर्वी प्रकृती बिघडली होती. त्यानंतर त्यांना उपचारासाठी पुण्यातील रुबी हॉल क्लिनिक (Ruby Hall Clinic) या रुग्णालयात अॅडमिट करण्यात आले होते. त्यांच्या सर्व चाचण्या करण्यात आल्या होत्या. त्यानंतर आज सकाळी शरद पवार यांना रुबी हॉल क्लिनिकमधून डिस्चार्ज देण्यात आला. आता नियमित तपासणीसाठी शरद पवार हे मुंबईतील ब्रीच कँडी रुग्णालयात दाखल झाले आहेत.

आज सकाळीच पुण्यातील रुग्णालयातून मिळाला डिस्चार्ज

22 फेब्रुवारी रोजी शरद पवार यांची प्रकृती बिघडली होती. त्यांना उलट्या सुरु झाल्या होत्या. उलट्या होत असल्यामुळे शरद पवार यांना डीहायड्रेशन झाले आहे. त्यामुळे पुण्यातील रुग्णालयात त्यांच्यावर उपचार करण्यात आले. त्यांच्या सर्व चाचण्या करण्यात आल्या होत्या. त्यांच्या सर्व चाचण्यांचे रिझल्ट हे नॉर्मल होते. त्यांना आराम मिळावा यासाठी दोन दिवस रुग्णालयात ठेवण्यात आले होते.

पुढील 2 ते 3 दिवस ब्रीच कँडी रुग्णालयात

आज सकाळी शरद पवार यांना पुण्यातील रुग्णालयातून डिस्चार्ज देण्यात आला. त्यानंतर ते मुंबईत आले आहेत. मुंबईत आल्यानंतर रुटीन चेकअपसाठी शरद पवार यांना ब्रीच कँडी रुग्णालयात दाखल करण्यात आले. त्यांच्या नियमीत केल्या जाणाऱ्या चाचण्या येथे करण्यात येणार आहेत. पुढील दोन ते तीन दिवस त्यांना ब्रीच कँडी रुग्णालयात ठेवले जाणार असल्याची माहिती समोर येत आहे.