घरगुती सिलिंडरमधून अडीच किलो गॅसची चोरी, 43 गॅसच्या टाक्या जप्त, 3 आरोपींना अटक
ग्राहकांना घरपोच दिल्या जाणार्‍या गॅस सिलिंडरच्या टाक्यांमधून गॅसची चोरी करण्याऱ्या टोळीला अटक करण्यात आलीये.
अहमदनगर : ग्राहकांना घरपोच दिल्या जाणार्‍या गॅस सिलिंडरच्या टाक्यांमधून गॅसची चोरी करण्याऱ्या टोळीला अटक करण्यात आलीये. व्यावसायिक वापरासाठीच्या गॅसच्या टाक्या ठिकाणी भरल्या जात होत्या, तेथे तोफखाना पोलिसांनी छापा टाकून ही कारवाई केली आहे. या छाप्यामध्ये एकूण 43 गॅसच्या टाक्या जप्त करण्यात आल्या असून तीन आरोपींना अटक करण्यात आलीये. (Gang arrested for stealing gas from gas tank in Ahmednagar)
घरगुती गॅस सिलिंडरमधून दोन ते अडीच किलो गॅसची चोरी
मिळालेल्या माहितीनुसार अहमदनगरमध्ये नागरिकांना दिल्या जाणाऱ्या प्रत्येक घरगुती गॅस सिलिंडरमधून दोन ते अडीच किलो गॅसची चोरी केली जात होती. घरगुती गॅस सिलिंडरमधील गॅस काढून तो व्यावसायिक वापराच्या गॅस सिलिंडरमध्ये भरला जात होता. या सर्व प्रकाराची माहिती पोलिसांना समजली. त्यानंतर पोलिसांनी हे रॅकेट उद्ध्वस्त करण्याचे ठरवले. त्यानुसार पोलिसांनी आपली योजना आखली.
रॅकेट सक्रिय असलेल्या ठिकाणी धडक कारवाई
गॅस चोरीची ही गुप्त माहिती मिळताच पोलीस निरीक्षक ज्योती गडकरी यांनी रॅकेट सक्रिय असलेल्या ठिकाणी धडक कारवाई केली. याप्रकरणी भगवानराम गिरधरीराम बिष्णोई, (वय 23 जोधपूर राजस्थान) भजनलाल जगदीश बिष्णोई, (राहणार राजस्थान) यांना ताब्यात घेतले. यामध्ये एका अल्पवयीन मुलाचादेखील समावेश आहे. या प्रकरणी तोफखाना पोलीस ठाण्यात गुन्हा दाखल करण्यात आला आहे.
गॅस चोरी करणाऱ्या अशा रॅकेटचा कायमस्वरुपी बंदोबस्त करावा
दरम्यान, घरगुती गॅस सिलिंडरमधून गॅस चोरीचा हा प्रकार समोर आल्यानंतर आश्चर्य व्यक्त केले जात आहे. या प्रकारामुळे अहमदनगरमध्ये खळबळ उडाली असून गॅस चोरी करणाऱ्या अशा रॅकेटचा कायमस्वरुपी बंदोबस्त करावा अशी मागणी केली जात आहे. पोलिसांनी आरोपींना ताब्यात घेतले असून त्यांची सखोल चौकशी सुरु आहे. आरोपींच्या चौकशीतून आणखी काही महत्त्वाच्या गोष्टी समोर येण्याची शक्यता व्यक्त केली जात आहे.
इतर बातम्या :
चाकू, तलवारी, रायफल, अन् बंदुका, अवैध शस्त्रांचं मोठं घबाड, भुसावळमध्ये पोलिसांची धडक कारवाई
आधी गळा आवळला नंतर पोत्यात भरलं, प्रियकरासोबत संसार थाटण्यासाठी तिनं पतीला संपवलं, चंद्रपूर हादरलं