नांदेडः शहर आणि परिसरातून जप्त करण्यात आलेल्या 1127 किलो गांजापोठपाठ एनसीबीने (NCB Raid) आणखी एक मोठी कारवाई केली आहे. मंगळवारी एनसीबीच्या पथकाने शहरात एका ट्रान्सपोर्ट कंपनीच्या (Transport) आड सुरु असलेल्या ड्रग्ज तस्करीचा पर्दाफाश केला आहे. या कारखान्यातून हेरॉइन बनवण्यासाठी लागणारे 111 किलो पॉपी स्ट्रॉ (खसखसचा पेंढा), नोटा मोजण्याचे मशीन आणि अफू जप्त करण्यात आले. एनसीबीचे झोनल डायरेक्टर समीर वानखेडे यांनी ही माहिती दिली.
नांदेड येथील कामठा परिसरात ही कारवाई करण्यात आली. या ठिकाणाहून 2 मशीन्सदेखील हस्तगत करण्यात आल्या असून 1.55 लाख रुपयांची रोकड जप्त करण्यात आली. या प्रकरणी तिघांना अटक झाली असून त्यात एक मुख्य आरोपी व अन्य दोन सहकारी आहेत. ड्रग्स निर्मिती आणि विक्री करणारी ही आंतरराज्यीय टोळी असून मुख्य आरोपी या फॅक्टरीचा मालक होता. तो ट्रान्सपोर्टमध्ये काम करायचा. ही टोळी राज्याबाहेरदेखील ड्रग्ज पुरवत असल्याचा संशय समीर वानखेडे यांनी व्यक्त केला आहे.
या फॅक्टरीत ड्रग्ज तयार करण्यासाठी मध्य प्रदेश, राजस्थान व इतर राज्यांतून अवैध पद्धतीने पॉपी स्ट्रॉ नांदेडमध्ये आणण्यात आले होते. हे पॉपी स्ट्रॉ ताजे असताना यातून बाहेर येणाऱ्या पदार्थातून अफू बनवली जाते. तर हे पॉपी स्ट्रॉ सुकल्यानंतर त्याचा वापर हेरॉइन बनवण्यासाठी केला जातो. या फॅक्टरीत ड्रग्ज तयार केल्यानंतर ते अनेक राज्यांना पुरवले जात होते, अशी माहिती एनसीबीच्या अधिकाऱ्यांनी दिली.
इतर बातम्या-