MLA Rohit Pawar : रोहित पवार यांच्या कंपनीवर कारवाई; 72 तासात प्लान्ट बंद करण्याची सूचना

बारामती | 28 सप्टेंबर 2023, नाविद पठाण : राष्ट्रवादीचे आमदार रोहित पवार यांच्या कंपनीवर राज्य शासनाच्या एका विभागाने कारवाई केली आहे. येत्या 72 तासात प्लान्ट बंद करण्याची सूचना देण्यात आल्या असल्याची माहिती आहे. राज्याच्या प्रदुषण मंडळाने बारामती ॲग्रो प्लान्टला नोटीस दिली आहे. राज्यातील दोन मोठ्या नेत्यांच्या सांगण्यावरून, द्वेष मनात ठेवून ही कारवाई झाल्याचा दावा आमदार रोहित पवार यांनी केला आहे. मी बोलतो म्हणून माझ्यावर कारवाई झाली आहे. पण मी संघर्ष करण्याचा निर्धार केला आहे. त्यामुळे मी घाबरणार नाही, असं रोहित पवार यांनी म्हटलं आहे. ट्विट करत रोहित पवार यांनी माहिती दिली आहे. या ट्विटच्या माध्यमातून रोहित पवार यांनी दोन नेत्यांवर निशाणा साधलाय. त्यामुळे हे दोन नेते कोण? अशी राजकीय वर्तुळात चर्चा होत आहे.

रोहित पवार यांचं ट्विट जसंच्या तसं

राज्यातील दोन मोठ्या नेत्यांच्या सांगण्यावरून कुठला तरी द्वेष मनात ठेवून आज पहाटे दोन वाजता राज्य शासनाच्या एका शासकीय विभागाच्या माध्यमातून माझ्या कंपनीच्या एका विभागावर कारवाई करण्यात आली.

युवा मित्रांना एकच सांगू इच्छितो की, संघर्ष करतांना भूमिका घेताना अनेक अडचणींचा सामना करावाच लागतो. मी बोलतो, ठोस भूमिका घेतो म्हणून मला अडचणीत आणण्यासाठी आता प्रयत्न सुरू झाले आहेत, परंतु अडचणी आल्या म्हणून संघर्ष थांबवायचा नसतो. भूमिका आणि निष्ठा बदलायची नसते ही मराठी माणसाची खासियत आहे.

हा लढा मी लढणारच आहे, परंतु ज्यांच्या सांगण्यावरून माझ्यावर कारवाई करण्यात येत आहे त्यांना एकच सांगायचंय की, मी आधी व्यवसायात होतो नंतर राजकारणात आलो, परंतु आधी राजकारणात येऊन आणि नंतर व्यवसायात आर्थिकदृष्ट्या बलाढ्य झालेले अनेक जण आहेत. त्यामुळे या नेत्यांना अपेक्षित असलेले काहीही साध्य होणार नाही. तसेच हे द्वेषाचं राजकारण आजच्या पिढीला पटणारंही नाही.

आपण सत्याच्या बाजूने आहोत आणि केवळ राजकीय सुडापोटी ही कारवाई होत असल्याने माझ्या कंपनीच्या कर्मचाऱ्यांनी आणि कुटुंबाने काळजी करण्याची गरज नाही. माझ्या वाढदिवसानिमित्त ‘गिफ्ट’ दिल्याबद्दल सरकारचे आभार मानतो, परंतु राज्यातली युवा आणि जनता सरकारला नक्कीच ‘रिटर्न गिफ्ट’ देईल, ही खात्री आहे.

असो!

पण सर्वसामान्यांच्या कामाला महिनोन महिने सुस्ती दाखवणारी यंत्रणा या दोन नेत्यांच्या इच्छेसाठी माझ्यावर कारवाई करताना खूप तत्परता दाखवते, याचा मात्र नक्कीच आनंद आहे. या सर्व प्रक्रियेत शासकीय अधिकाऱ्यांना मी कुठलाही दोष देत नाही. न्यायव्यवस्थेवर माझा पूर्ण विश्वास असून सत्याच्या आधारे न्यायालयात माझा लढा सुरूच राहील.