Uttar Pradesh Heavy Rain : 60 तासांपासून पाऊस थांबेना! उत्तर प्रदेशात 56 जणांनी गमावला जीव; 63 जिल्ह्यांना पुराचा धोका

उत्तर प्रदेशात मुसळधार पावसामुळे सध्या जनजीवन मोठ्या प्रमाणावर विस्कळीत झाले आहे. गेल्या 60 तासांपासून सुरू असलेल्या संततधार पावसामुळे विविध भागांत अनेक दुर्घटना घडल्या असून, त्यात एकूण 56 जणांचा मृत्यू झाल्याची धक्कादायक माहिती समोर आली आहे. पावसामुळे रस्ते, वाहतूक आणि दैनंदिन कामकाजावर गंभीर परिणाम झाला आहे. अनेक ठिकाणी पाणी साचल्याने नागरिकांना मोठ्या अडचणींचा सामना करावा लागत आहे.

राज्यातील एकूण 63 जिल्ह्यांमध्ये पुराचा धोका निर्माण झाला आहे. नद्यांच्या पाणी पातळीत वाढ झाल्यामुळे अनेक सखल भागांमध्ये पाणी शिरले आहे, तर काही ठिकाणी पूरसदृश परिस्थिती निर्माण झाली आहे. या गंभीर स्थितीच्या पार्श्वभूमीवर हवामान खात्याने संपूर्ण राज्यात सतर्कतेचा इशारा (अलर्ट) जारी केला आहे. नागरिकांना सुरक्षित राहण्यासाठी आवश्यक ती खबरदारी घेण्याचे आणि प्रशासनाच्या सूचनांचे पालन करण्याचे आवाहन करण्यात येत आहे. स्थानिक प्रशासनामार्फत मदतकार्य सुरू करण्यात आले असून, पूरग्रस्त भागातून नागरिकांना सुरक्षित स्थळी हलविण्याचे प्रयत्न सुरू आहेत.