पुण्यात मोठी दुर्घटना, होर्डिंग कोसळल्याने हाहाकार, 4 ते 5 जणांचा मृत्यू

पुणे : पिंपरी-चिंचवड येथून एक मोठी बातमी समोर आली आहे. पिंपरी-चिंचवडच्या रावेर येथे मोठी दुर्घटना घडली आहे. रावेरमध्ये वादळी वाऱ्यामुळे होर्डिंग कोसळून काही जणांचा मृत्यू झाल्याची माहिती समोर येत आहे. या दुर्घटनेत 4 ते 5 जणांचा मृत्यू झाल्याची माहिती मिळत आहे. वादळी वाऱ्यासह पाऊस कोसळल्यामुळे होर्डिंग कोसळले. यावेळी होर्डिंगखाली आठ जण अडकल्याची माहिती समोर आली होती. त्यापैकी चार ते पाच जणांचा मृत्यू झाल्याची माहिती समोर आलीय.

विशेष म्हणजे पुण्यात होर्डिंग कोसळून मृत्यू होण्याची ही पहिली घटना नाही. याआधीदेखील पुण्यात रसत्यावर होर्डिंग कोसळल्याने अनेकांचा मृत्यू झाल्याची माहिती समोर आली होती. त्यानंतर आज पुन्हा होर्डिंग कोसळल्याची माहिती समोर आली आहे. या घटनेमुळे रावेरमध्ये खळबळ उडाली आहे. तसेच होर्डिंगमुळे कोसळल्याची घटना समोर आल्याने सर्वसामान्यांचा सुरक्षेचा प्रश्न पुन्हा समोर आला आहे.

नेमकं काय घडलं?

पिंपरी चिंचवडमध्ये आज संध्याकाळी अचानक वादळी वाऱ्यासह मुसळधार पावसाला सुरुवात झाली. पिंपरी चिंचवड शहरात बहुतांश ठिकाणी वादळी पावसाला सुरुवात झाली. अचानक सुरू झालेल्या पावसामुळे नागरिकांची प्रचंड तारांबळ उडाली. अनेक ठिकाणी झाड उन्मळून पडली. तर वाऱ्यामुळे गाड्या पडल्याचं चित्र दिसत होतं. रावेत भागात रस्त्यावर अनेक ठिकाणी पाणी साचल्याने मोठी वाहतूक कोंडी निर्माण झाली. शहरात रस्त्यांवर लावण्यात आलेले बॅनर टराटरा फाटले. सोसाट्याच्या वाऱ्यामुळे स्टँडवर लावलेल्या गाड्या जमिनीवर पडल्या.

पाऊस आणि वादळी वाऱ्याने रौद्र रुप धारण केलं. त्यातून रावेर येथे मोठं होर्डिंग थेट जमिनीवर कोसळलं. यावेळी सात ते आठ जण होर्डिंग खाली कोसळल्याचा अंदाज वर्तवण्यात आला. घटनेमुळे परिसरात एकच खळबळ उडाली. स्थानिक नागरिकांनी तातडीने पोलिसांना या घटनेची माहिती दिली. तसेच स्थानिकांकडून अडकलेल्यांना बाहेर काढण्याचे शर्थीने प्रयत्न सुरु झाले.

संबंधित घटनेची माहिती मिळताच पोलीस घटनास्थळी दाखल झाले. पोलिसांनी घटनेचं गांभीर्य ओळखून तातडीने इतर प्रशासनाला याबाबतव माहिती दिली. त्यानंतर घटनास्थळी तातडीने क्रेन मागवण्यात आलं. क्रेनच्या मार्फत कोसळलेलं होर्डिंगचे भाग बाजूला सारण्याचं काम सुरु झालं आणि अडकलेल्यांना बाहेर काढण्याचे प्रयत्न सुरु झाले. घटनेचं गांभीर्य ओळखून तातडीने चार ते पाच रुग्णवाहिका घटनास्थळी बोलावण्यात आल्या. जखमींना तातडीने रुग्णालयात दाखल करण्यात आलं. पण या दुर्घटनेत आतापर्यंत चार ते पाच जणांचा मृत्यू झाल्याची माहिती मिळाली आहे. या घटनेमुळे संपूर्ण रावेर परिसर हादरला आहे.