तुम्हालाही मंत्री व्हायचंय? महादेव जानकर यांनी सांगितला मंत्री बनण्याचा फॉर्म्युला; काय म्हणाले जानकर?
दीड वर्ष झाले वसंत मोरेंच्या पाठीमागे आहे. त्यांचाही लहान पक्ष आहे. एकच आमदार आहे आणि माझाही एकच आमदार आहे. त्यामुळे मी त्यांच्या मागे आहे. वसंत मोरेंनी आमदार बनावं, खासदार बनावं अशी माझी इच्छा आहे.
पुणे: राज्यात तब्बल अडीच वर्षानंतर भाजप आणि शिंदे गटाचं सरकार आलं आहे. या सरकारचा एक मंत्रिमंडळ विस्तारही झाला. त्यात फक्त भाजप आणि शिंदे गटाच्या नेत्यांनाच स्थान देण्यात आलं आहे. भाजपने मित्र पक्षांना स्थान दिलं नाही. त्यामुळे मित्र पक्ष नाराज आहेत. खासकरून राष्ट्रीय समाज पार्टीचे नेते महादेव जानकर हे मंत्री न बनविल्याने नाराज आहेत. त्याची सल त्यांनी बोलून दाखवली आहे. त्यामुळेच त्यांनी भाजपला धडा शिकवण्यासाठी संघटना बांधणी सुरू केली आहे. भाजपमध्ये असतो तर आज मंत्री झालो असतो. पण आता अशी तयारी करायची की आपल्याशिवाय सरकारच बनता कामा नये, असं महादेव जानकर यांनी म्हटलं आहे.
पुण्यातील जाधवर इन्स्टिट्यूटच्या कार्यक्रमात महादेव जानकर यांनी तुफान फटकेबाजी केली. यावेळी त्यांनी भाजपवर जोरदार हल्ला चढवला आहे. आम्ही आमदार निवडून आणतो आणि रामदास तडसांचा पक्ष पळवून नेतो. ठाकरेंचा पक्ष पळवून नेला जातो, अशी टीका महादेव जानकर यांनी भाजपवर केली आहे. भाजप हा इतर आमदार फोडण्यावरच जोर देत असल्याचं जानकर यांचं म्हणणं आहे.
तर मंत्री झालो असतो
आम्ही भाजपात असतो तर मंत्री झालो असतो. मात्र आता असा बंदोबस्त करू की, आमच्या शिवाय सरकार बनवताना त्यांना विचार करावा लागेल. माझा पक्ष आता राष्ट्रीय पक्ष बनणार आहे. मला मुंबईत घरं मिळालं, आता दिल्लीत पक्षाचं ऑफिस मिळणार आहे, असं जानकर म्हणाले.
दीड वर्षांपासून वसंत मोरेंच्या मागे
2024 ला मी 100 टक्के खासदार बनणार आहे. बारामती शहरानं फक्त माझ्यावर प्रेम केलं नाही तर आजूबाजूच्या लोकांनीही खूप प्रेम केलं. दीड वर्ष झाले वसंत मोरेंच्या पाठीमागे आहे. त्यांचाही लहान पक्ष आहे. एकच आमदार आहे आणि माझाही एकच आमदार आहे. त्यामुळे मी त्यांच्या मागे आहे. वसंत मोरेंनी आमदार बनावं, खासदार बनावं अशी माझी इच्छा आहे, असं ते म्हणाले.
जलील खासदार व्हावेत ही माझीच इच्छा
इम्तियाज जलील खासदार व्हावेत अशी माझी इच्छा होती. इम्तियाज जलील हुशार माणूस आहे, असं ते म्हणाले. यावेळी त्यांनी मंत्री बनण्याचा फॉर्म्युलाच सांगितला. तरुणांनो राजकारणात या. लवकर मंत्री व्हायचं असेल तर छोट्या पक्षात काम करा. तुम्ही मंत्री झालाच म्हणून समजा, असंही ते म्हणाले.
