पुण्यात क्लोरिन गॅस गळतीने एकच खळबळ, 24 जण रुग्णालयात दाखल

पुण्याच्या कोंढवा भागात गुरुवारी क्लोरिन गॅसची गळती झाली. त्यामुळे एकच खळबळ उडाली. बंद पडलेल्या जलशुद्धीकरण केंद्रात क्लोरिन गॅस गळती झाली. या गॅसच्या संपर्कात आल्याने फायर ब्रिगेडच्या दोन जवानांसह 24 लोकांना श्वासोश्वास करण्यास त्रास होत होता. त्यांना लगेच रुग्णालयात दाखल करण्यात आलं. कोंढवा येथील गंगाधाम भागात मध्यरात्री एका बंद असलेल्या जलशुद्धीकरण केंद्रातील गोदामात क्लोरिनच्या टाकीतून गॅस गळती होत असल्याची माहिती मिळाली होती, असं फायर ब्रिगेडचे अधिकारी सुनील नाइकनावारे यांनी सांगितलं.

माहिती मिळताच घटनास्थळी दाखल झालेल्या फायरब्रिगेडच्या टीमने सगळा परिसर रिकामी केला. गॅस गळती रोखण्यासाठी टाकीला पॅच लावला. या प्रक्रियेमध्ये फायर ब्रिगेडच्या दोन जवानांना गॅस गळतीची बाधा झाली. गॅसचा आसपासच्या परिसरात फैलाव झाल्याने 22 लोक आणि बचाव कार्यात गुंतलेल्या दोन जवानांना श्वासोश्वास करण्यास त्रास सुरु झाला. सर्वांना जवळच्या ससून जनरल हॉस्पिटलमध्ये दाखल करण्यात आलं. त्यांच्यावर उपचार सुरु आहेत.

डॉक्टरांच्या देखरेखीखाली उपचार

रुग्णालयात दाखल असलेले 22 नागरिक आणि दोन जवनांच्या जिवीताला कोणताही धोका नाही अशी माहिती अधिकाऱ्याने दिली. सध्या त्यांच्यावर डॉक्टरांच्या देखरेखीखाली उपचार सुरु आहेत. बंद पडलेल्या प्लांटमध्ये इतक्या खतरनाक गॅस टाकीच्या बाबतीत बेपर्वाई कशी याचा पोलीस आणि प्रशासन शोध घेत आहेत.