पुणे कसबा पेठ, पिंपरी चिंचवडमधील भाजप उमेदवार जाहीर, वाचा कोणाला मिळाली उमेदवारी
कसबा मतदार संघातून टिळक यांच्या परिवारातून उमेदवारी दिली नाही तर पिंपरी चिंचवडमधून लक्ष्मण जगताप यांच्या कुटुंबातून उमेदवारी दिली आहे. कसबा पेठमध्ये हेमंत नारायण रासने यांना उमेदवारी जाहीर केली आहे
पुणे : पुण्यातील पिंपरी चिंचवड व कसबा विधानसभेची (kasba and pimpri chinchwad bypoll election) पोटनिवडणूक २६ फेब्रवारी रोजी होणार आहे. यासाठी भाजपने दोन्ही उमेदवार जाहीर केले आहेत. कसबा मतदार संघातून टिळक यांच्या परिवाराला उमेदवारी दिली नाही तर पिंपरी चिंचवडमधून लक्ष्मण जगताप यांच्या कुटुंबातून उमेदवारी दिली आहे. कसबा पेठमध्ये हेमंत नारायण रासने यांना उमेदवारी जाहीर केली आहे. टीव्ही ९ ने हेमंत रासने यांना उमेदवारी मिळणार असल्याची बातमी शुक्रवारीच दिली होती. पिंपरी चिंचवडमधून अश्विनी लक्ष्मण जगताप यांना भाजपने उमेदवारी दिली आहे.
चिंचवड विधानसभा पोटनिवडणुकीसाठी दिवंगत आमदार लक्ष्मण जगताप यांच्या पत्नी अश्विनी जगताप यांना उमेदवारी देण्यात आली आहे.
भाजपने दिवंगत आमदार मुक्ता टिळक यांचे चिरंजीव कुणाल टिळक (Kunal Tilak) यांना प्रदेश प्रवक्ते केले. खरंतर गेल्या महिन्यात भाजपचे प्रदेश प्रवक्त्यांची यादी जाहीर झाली होती.भारतीय जनता पक्षाने नवीन यादीत कुणाल यांच्या नावाची भर घालून ती पुन्हा प्रसिद्ध केली. यामुळे भाजपचा उमेदवार टिळक परिवारातील नसणार का? ही चर्चा सुरु होती. त्यानुसार टिळक परिवारात उमेदवारी देण्यात आली नाही.
कोण आहेत हेमंत रासने
हेमंत रासने हे पुणे भारतीय जनता पक्षाचे जुने कार्यकर्ते आहेत. पुणे महानगरपालिकेच्या स्थायी समितीचे अध्यक्ष होते. श्रीमंत दगडूशेठ गणपती मंडळाच्या माध्यमातून गेल्या ३० वर्षांपासून ते सामाजिक क्षेत्रात आहे. गणेश मंडळाच्या कार्यकर्ता म्हणून संधी मिळाली. सर्वांच्या अपेक्षा आपण पुर्ण करणार असल्याचे रासने यांनी सांगितले.
जबाबदारी वाढली
भाजपमध्ये गटातटाचे राजकारण नसते. पक्ष ठरवते, त्याप्रमाणे कार्यकर्ते काम करतात. नगरसेवक म्हणून १२ ते २० वर्षांपासून काम करताना आता राज्य पातळीवर काम करण्याची संधी मिळाली, यामुळे आता जबाबदारी वाढली असे हेमंत रासने यांनी सांगितले.
टिळक कुटुंबीयांशी चर्चा करुन निर्णय
भाजप नेते चंद्रकांत पाटील यांनी टिळक कुटुंबीयांशी चर्चा करुन कसबा पेठेतील उमेदवार ठरवल्याचे सांगितले. आता कुणाल टिळक यांच्यांवर नवीन जबाबदारी देण्यात आली, असे पाटील यांनी सांगितले.
आघाडीचे उमेदवार जाहीर
काँग्रेसकडून कसब्यातून रवींद्र धंगेकर यांना उमेदवारी देण्यात आली आहे. तर चिंचवडमधून राहुल कलाटे यांना उमेदवारी देण्यात आली आहे. चिंचवडची जागा शिवसेनेला लढायची होती. पण राष्ट्रवादीने ही जागा सोडण्यास नकार दिल्याने अखेर शिवसेनेने या जागेचा हट्ट सोडला.
