Sharad Mohol Murder | शरद मोहोळ याचा खून हा मामाचा वाद नाही, दुसरेच कारण येणार समोर

पुणे, दि. 8 जानेवारी 2024 | शरद मोहोळ याचा खून मामाशी असलेल्या वादाचा बदला घेण्यासाठी करण्यात आला. वीस वर्ष वय असलेला साहिल पोळेकर आणि त्याचा मामा नामदेव कानगुडे हे या खुनाचे सूत्रधार आहेत. हा खून नामदेव कानगुडे सोबत असलेल्या जमिनीचा वादातून झाल्याचे आरोपींनी म्हटले आहे. परंतु त्यांचा हा दावा पटणारा नाही. यामुळे पुणे पोलिसांनी या प्रकरणाची पाळेमुळे शोधण्यासाठी कसून चौकशी सुरु केली आहे. शरद मोहोळ याचा खुनामागे बडी धेंडे असल्याचा पोलिसांचा अंदाज आहे. त्यामुळे पोलीस कोठडीत असलेल्या सर्व आरोपींची कसून चौकशी केली जात आहे. एकमेकांसमोर बसवून आरोपींची चौकशी केली जात आहे.

पोलिसांनी सुरु केली इतर गुन्हेगारांची चौकशी

शरद मोहोळ खून प्रकरण साधे अन् सोपे नाही. यामागे नियोजनबद्ध कट आहे. गुन्हेगारी विश्वातील आरोपी किंवा इतर कोणी यामागे आहे का? याचाही तपास केला जात आहे. यामुळे पोलिसांनी मुळशीतील एका कुख्यात गुन्हेगाराला चौकशीसाठी बोलावले होते. पोलिस आयुक्तालयात सहायक आयुक्त सतीश गोवेकर यांनी त्याची चौकशी केली. त्यानंतर त्याला सोमवारी पुन्हा बोलवले आहे. हा गुन्हेगार सध्या राजकीय पक्षाशी संबंधित आहे. काही महिन्यांपूर्वी त्याचा आणि शरद मोहोळ यांच्यात वादही झाला होता.

आरोपींनी दिल्या होत्या घोषणा?

खून केल्यानंतर आरोपींना एका गुंडाच्या नावाने घोषणा दिल्याचे सांगितले जात आहे. आरोपींनी या घोषणा का दिल्या? तपास भरकटवायचा आहे का? किंवा दुसऱ्या एका गुंडांने शरद मोहोळ याला मारण्याची सुपारी दिली, यासंदर्भात तपास केला जात आहे. या प्रकरणात मारणे टोळी आहे का? कारण संदीप मोहोळ याच्या हत्यनंतर शरद मोहळ याने मारणे टोळीशी बदला घेतला होता. यामुळे शरद मोहोळ मारणे टोळीच्या रडारवर होता, असे बोलले जाते. त्यातूनच मोहोळ याचा ‘गेम’ झाला का? ही शक्यता पोलीस तपासात आहे.