रुपाली चाकणकरांना ईडीचे समन्स? भोंदू बाबा अशोक खरात प्रकरण भोवणार
राज्य महिला आयोगाच्या माजी अध्यक्षा रूपाली चाकणकर यांना ईडीने समन्स बजावले असून ७० कोटींच्या कथित खंडणी रॅकेटप्रकरणी त्यांची चौकशी होण्याची शक्यता आहे. जाणून घ्या सविस्तर माहिती.
नाशिकचा भोंदू बाबा अशोक खरातची वेगवेगळ्या प्रकरणांमध्ये सखोल चौकशी सुरू आहे. याच प्रकरणामुळे अडचणीत सापडलेल्या राज्य महिला आयोगाच्या माजी अध्यक्षा रूपाली चाकणकर या पुन्हा एकदा चर्चेत आल्या आहेत. रुपाली चाकणकर यांच्या अडचणीत मोठी भर पडण्याची शक्यता निर्माण झाली आहे. रुपाली चाकणकर यांची दोन दिवसांपूर्वीच विशेष तपास पथकाद्वारे (SIT) साडेपाच तास चौकशी करण्यात आली होती. आता या प्रकरणी सक्तवसुली संचालनालयाने (ED) उडी घेतली आहे. सूत्रांनी दिलेल्या माहितीनुसार, ईडीने रुपाली चाकणकर यांना समन्स बजावले असून लवकरच त्यांची कसून चौकशी केली जाणार आहे.
नेमकं प्रकरण काय?
नाशिकचा भोंदू बाबा म्हणून ओळखल्या जाणाऱ्या अशोक खरात याने एक मोठे खंडणी रॅकेट चालवल्याचा आरोप आहे. या रॅकेटच्या माध्यमातून त्याने ७० कोटी रुपयांहून अधिक रक्कम गोळा केल्याचा संशय आहे. ही मोठी रक्कम वळवण्यासाठी त्याने अनेक बेनामी बँक खाती वापरली होती. याच प्रकरणात रूपाली चाकणकर यांचे नाव समोर आले आहे. आता त्यांचा या आर्थिक व्यवहारांशी काही संबंध आहे का, याचा तपास यंत्रणा करत आहेत.
आतापर्यंत काय घडले?
त्यातच आता दोन दिवसांपूर्वीच नाशिकमध्ये SIT ने रूपाली चाकणकर यांची तब्बल साडेपाच तास चौकशी केली. यावेळी त्यांच्याकडून विविध कागदपत्रांची पडताळणी करण्यात आली. SIT च्या चौकशीनंतर आता ईडीने रुपाली चाकणकर यांना समन्स (नोटीस) बजावले आहे. याचा अर्थ आता केंद्रीय यंत्रणा या प्रकरणातील मनी लाँड्रिंग, पैशांचा बेकायदेशीर वापर यांसह विविध गोष्टींची चौकशी करणार आहे.
रुपाली चाकणकर यांनी आपल्या पदाचा वापर करून काही संशयास्पद आर्थिक व्यवहार करण्यास मदत केली का? ‘शिवनिका’ नावाच्या संस्थेतील त्यांचा सहभाग आणि त्या माध्यमातून झालेले आर्थिक व्यवहार आता रडारवर आहेत. अशोक खरातने जमवलेल्या ७० कोटींच्या खंडणीत चाकणकर यांचा काही हिस्सा होता का किंवा ही रक्कम वळवण्यासाठी त्यांनी मदत केली का? या प्रकरणाचे धागेदोरे इतर राज्यांशी जोडले गेले आहेत का, याचाही शोध ईडी घेणार आहे.
राजकीय वर्तुळात खळबळ
मिळालेल्या माहितीनुसार, SIT आपला चौकशी अहवाल लवकरच ईडीला सादर करणार आहे. जर या चौकशीत ठोस पुरावे सापडले, तर रूपाली चाकणकर यांच्यावर कठोर कायदेशीर कारवाई होण्याची दाट शक्यता आहे. ऐन राजकीय घडामोडींच्या काळात केंद्रीय यंत्रणेने या प्रकरणात प्रवेश केल्यामुळे महाराष्ट्राच्या राजकारणात मोठी खळबळ उडाली आहे.
