सातारा डॉक्टरच्या पोस्टमॉर्टम रिपोर्ट समोर, तिच्या शरीरावर…मृत्यूचं नेमकं कारण काय?
साताऱ्यातील डॉक्टर महिलेच्या प्रकणात धक्कादायक माहिती समोर आली आहे. या प्रकरणात शवविच्छेदनाचा अहवाल समोर आला असून त्यात अनेक धक्कादायक बाबी नमूद करण्यात आल्या आहेत.
Satara Phaltan Doctor Death Case : सातारा जिल्ह्यातील फलटण येथील डॉक्टर महिलेच्या मृत्यू प्रकरणात रोज नवनवे खुलासे होत आहेत. या डॉक्टर महिलेच्या मृतदेहाचे शवविच्छेदन करण्यात आले होते. शवविच्छेदनाच्या अहवालात नेमकी कोणती माहिती समोर येणार? याकडे सर्वांचेच लक्ष लागले आहे. दरम्यान, आता हा शवविच्छेदनाचा अहवाल समोर आला आहे. या अहवालानुसार डॉक्टर महिलेचा मृत्यू हा गळफास घेतल्याने झाला आहे. विशेष बाब म्हणजे या डॉक्टर महिलेच्या शरीरावर अन्यत्र कुठेही जखमा नाहीत, असे या अहवालात नमूद करण्यात आले आहे.
गळफास घेतल्याने मृत्यू, शरीरावर कोणतीही…
सातारा डॉक्टर महिला आत्महत्या प्रकरणात मृतदेहाचे शवविच्छेदन करण्यात आले असून त्याचा अहवालही समोर आला आहे. मिळालेल्या माहितीनुसार डॉक्टर महिलेचा मृत्यू हा गळफास घेतल्याने झाला आहे. सोबतच तिच्या शरीरावर कोणतीही जखम नाही. हाच शवविच्छेदन अहवाल पोलिसांना प्राप्त झाला आहे.
डॉक्टर महिलेचे बदने, बनकरशी फोन कॉल झाल्याचे समोर, पण..
दुसरीकडे पीएसआय बदने, पोलीस कर्मचारी बनकर तसेच मृत डॉक्टर यांचे सीडीआर पोलिसांच्या हाती आले आहेत. याच सीडीआरचा आता तपास केला जात आहे. पोलिसांनी आतापर्यंत केलेल्या तपासातून मृत डॉक्टरचे बदने तसेच बनकर या दोघांसोबतही फोन कॉल झालेले आहेत. त्यामुळे डॉक्टर महिलेचे दोघांशी नेमके कोणत्या विषयावर बोलणे व्हायचे, हे पाहणे महत्त्वाचे ठरणार आहे. सध्यातरी बदनेने पोलिसांना त्याचा फोन दिलेला नाही. बदनेच्या फोनचा तपास सुरू आहे. माझे डॉक्टर महिलेसोबत मैत्रीशिवाय दुसरे कोणतेही रिलेशन नसल्याचे बदने पोलिसांना सांगत आहे. त्यामुळे महिला डॉक्टर मृत्यू प्रकरणाचे गूढ जास्तच वाढले आहे.
महिला डॉक्टर प्रकरणी राजकारण तापलं
दरम्यान, सातारा घटनेचे राजकीय पडसदाही उमटत आहेत. या प्रकरणाचा भाजपाचे नेते तथा माजी खासदार रणजितसिंह निंबाळकर यांच्याशी लावला जात आहे. तर मुख्यमंत्री देवेंद्र फडणवीस यांनी मात्र डॉक्टर महिलेच्या मृत्यू प्रकरणाचा निंबाळकरांशी कोणताही संबंध नाही, असे सांगत त्यांना क्लीनचीट दिलेली आहे. तर दुसरीकडे डॉक्टर महिलेने आत्महत्या केली आहे की तिचा खून करण्यात आलाय, याचा तपास व्हायला हवा, अशी मागणी केली जात आहे. त्यामुळे या प्रकरणी भविष्यात नेमकं काय घडणार? हे पाहणे महत्त्वाचे ठरणार आहे.
