सांगोल्यात मोठ्या राजकीय भूकंपाचे संकेत, महाविकास आघाडीत बिघाडीची दाट शक्यता

महाविकास आघाडीतून सांगोल्याचे शेकाप नेते बाहेर पडण्याची शक्यता आहे. सांगोल्यातील शेकाप नेत्यांनी ठाकरे गटावर नाराजी व्यक्त केली आहे. त्यामुळे महाविकास आघाडीतून शेकाप पक्ष बाहेर पडण्याच्या तयारीत आहे. विशेष म्हणजे नुकतंच समाजवादी पक्षाने महाविकास आघाडीतून बाहेर पडण्याचा निर्णय घेतला आहे. त्यानंतर आता शेतकरी कामगार पक्षाने महाविकास आघाडीत सन्मानजनक वागणूक मिळत नसेल तर बाहेर पडण्याची भूमिका जाहीर केली आहे. महाविकास आघाडीत सांगोला विधानसभेची जागा शेकापच्या वाट्याला असताना देखील उद्धव बाळासाहेब ठाकरे यांनी दीपक साळुंखे यांना घेतल्याने शेकापने नाराजी व्यक्त केली आहे. महाविकास आघाडीत वेगळा निर्णय घेतला जात असेल तर शेकाप आपला उमेदवार याठिकाणी देणार, अशी भूमिका शेकाप नेते डॉ. बाबासाहेब देशमुख यांनी घेतली आहे.

महाविकास आघाडीत जर सन्माजनक वागणूक मिळत नसेल तर शेतकरी कामगार पक्ष तत्काळ महाविकास आघाडीतून बाहेर पडेल आणि आगामी निवडणुकीत शेकाप सांगोला विधानसभेत उमेदवार देईल आणि निवडणूक लढेल. हीच गणपत देशमुख यांना श्रद्धांजली असणार आहे, अशी भूमिका शेकाप नेते बाबासाहेब देशमुख यांनी मांडली आहे. बाबासाहेब देशमुख हेच शेकापचे सांगोल्याचे संभाव्य उमेदवार आहेत.

दिवंगत आमदार आबासाहेब देशमुख यांनी गेले 60 वर्ष सांगोला तालुक्याचे नेतृत्व केले. या तालुक्यात पुरोगामी विचार टिकवण्यासाठी गणपतराव देशमुख यांनी अहोरात्र कष्ट घेतले आहेत. त्यामुळे महाविकास आघाडीने सांगोल्याची जागा ही शेकापला सोडावी, अशी बाबासाहेब देशमुख यांची भूमिका आहे.

बाबासाहेब देशमुख यांचा मोठा इशारा

शेतकरी कामगार पक्ष हा महाविकास आघाडीचा घटक पक्ष आहे. महाविकास आघाडीकडून रायगड, कंधार, सांगोला या जागा सन्मानाने आम्हाला नाही मिळाल्या तर शेतकरी कामगार पक्ष महाविकास आघाडीतून बाहेर पडून स्वतःच्या ताकदीची चुणूक महाराष्ट्राला दाखवून देईल, असा इशारा शेतकरी कामगार पक्षाचे नेते बाबासाहेब देशमुख यांनी दिला. आहे.

सांगोला विधानसभा मतदारसंघात महाविकास आघाडीने सांगोल्याची जागा दुसऱ्या पक्षाला दिल्यास शेतकरी कामगार पक्षाचा उमेदवार सांगोला विधानसभा मतदारसंघात उभा राहणार आणि विजयी होणार असल्याचे मत शेकापचे नेते बाबासाहेब देशमुख यांनी व्यक्त केले आहे. यामुळे आता आघाडी बिघाडी होण्याची शक्यता आहे.