भाजपा खासदाराचा पहाटे पहाटे भीषण अपघात, थोडक्यात बचावले हेमंत सावरा, एअर बॅग नसती तर…

ठाणे जिल्ह्यात शुक्रवारची सकाळ धक्कादायक ठरली. भाजपचे पालघरचे खासदार डॉ. हेमंत विष्णू सावरा यांच्या गाडीचा भीषण अपघात झाल्याची माहिती समोर आली आहे. ही दुर्घटना आज सकाळच्या सुमारास घोडबंदर रोड येथे घडली. खासदार सावरा यांच्या गाडीला डंपरने जोरदार धडक दिली. या धडकेत गाडीचे मोठ्या प्रमाणावर नुकसान झाले आहे. मात्र सुदैवाने, डॉ. सावरा यांना कोणतीही दुखापत झालेली नसून ते सुखरूप असल्याचे समजते.

पण खासदार सावरा यांच्या गाडीच्या चालकाला मात्र किरकोळ दुखापत झाल्याची माहिती समोर आली आहे. शुक्रवारी सकाळी हा अपघात आला, तेव्हा खासदार सावरा यांची गाडी मुंबईहून गुजरातच्या दिशेने जात होती. त्याचवेळी मुंबईच्या लेनवरून एक डंपर येत होता. त्याच डंपरचीखासदार सावरा यांच्या गाडीशी थेट धडक झाली. दोन्ही वाहनांची समोरासमोर जोरदार टक्कर झाली.

एअरबॅग नसती तर झाला असता मोठा अनर्थ

सुदैवाने ही टक्कर झाली तेव्हा कारमधील एअरबॅग्ज तात्काळ उघडल्या गेल्या आणि मोठं नुकसान टळल. गाडीतील प्रवासी देखील सुरक्षित राहिले. या अपघाताची माहिती मिळताच, नायगाव पोलीस ठाण्यातील एक पथक घटनास्थळी दाखल झालं. आणि त्यांनी मदतकार्य सुरू केले. पोलिसांच्या सांगण्यानुसार, या प्रकरणाचा अद्याप तपास सुरू असून अपघाताच्या कारणाचा शोध घेतला जात आहे. दरम्यान, अपघाताचे फोटो आणि व्हिडिओ सोशल मीडियावर समोर आले असून, त्यामध्ये खासदार सावरा यांच्या गाडीची भीषण अवस्था दिसत आहे

अपघातानंतर काय म्हणाले सावरा ?

अपघातावेळी नेमकं काय घडलं, ते सावरा यांनी स्वत: सांगितलं. सावरा यांच्या म्हणण्यानुसार, ते महाराष्ट्र दिनाच्या एका कार्यक्रमाला उपस्थित राहण्यासाठी ठाण्याहून पालघरला जात होते. मात्र वर्सोवा खाडी पूल (भाईंदर खाडी पूल) ओलांडल्यानंतर लगेचच एका डंपर ट्रकने त्यांच्या वाहनाला धडक दिली. “डंपर चालकाला आमची गाडी दिसली नाही आणि त्याने आम्हाला धडक दिली.” असं ते म्हणाले. घटनेची माहिती मिळताच नायगाव पोलीस तात्काळ घटनास्थळी दाखल झाले असून पुढील तपास सुरू आहे.