तुम्ही अश्लील मेसेज पाठवलेत, आता तुम्हाला…; घाबरलेल्या आजोबांसोबत नेमकं काय घडलं?
ठाण्यात एका ६४ वर्षीय वृद्धाला 'डिजिटल अरेस्ट'च्या जाळ्यात ओढून १ कोटी ५६ लाखांना लुटल्याची धक्कादायक घटना समोर आली आहे. सायबर चोरट्यांनी पोलीस अधिकारी असल्याचे भासवून महिनाभर मानसिक दबावाखाली ठेवत ही फसवणूक केली.
गेल्या काही दिवसांपासून सायबर गुन्ह्याच्या घटनेत सातत्याने वाढ होत आहे. यावेळी सायबर गुन्हेगार वृद्धांना टार्गेट करुन त्यांची लूट करत असल्याचे पाहायला मिळत आहे. आता नुकतंच मुंबईच्या वेशीवर असलेल्या ठाण्यात एका ६४ वर्षीय ज्येष्ठ नागरिकाला सायबर चोरट्यांनी फसवल्याची घटना घडल्याचे समोर आले आहे. यावेळी सायबर चोरट्यांनी डिजिटल अरेस्ट (Digital Arrest) च्या जाळ्यात ओढून तब्बल १ कोटी ५६ लाख रुपयांचा गंडा घातल्याचा धक्कादायक प्रकार समोर आला आहे. यावेळी आरोपींनी पोलीस अधिकारी असल्याचे भासवून पीडित व्यक्तीला महिनाभर मानसिक दबावाखाली ठेवले आणि त्यांच्या आयुष्यभराची सर्व पुंजी लुटली.
बनावट कागदपत्रांचा आधार आणि भीतीचे वातावरण
मिळालेल्या माहितीनुसार, ठाण्यातील एका ६४ वर्षीय व्यक्तीशी सायबर चोरट्यांनी विविध मोबाईल क्रमांकांवरून संपर्क साधला. यावेळी त्यांनी स्वतःची ओळख मुंबई पोलीस अधिकारी म्हणून करून दिली. या फोनद्वारे त्यांनी पीडित वृद्ध व्यक्तीवर अत्यंत गंभीर आरोप केले. तुम्ही ४० महिलांना अश्लील मेसेज आणि व्हिडीओ पाठवले आहात. तुमचे आधार कार्ड आणि बँक तपशील एका हाय-प्रोफाईल मनी लाँड्रिंग प्रकरणाशी जोडले गेले आहे. त्यामुळे तुम्हाला लवकरच तुम्हाला अटक करण्यात येईल, असा दावा सायबर चोरट्यांनी फोन द्वारे केला.
यानंतर या वृद्ध व्यक्तीची खात्री पटावी, म्हणून गुन्हेगारांनी मुंबई पोलिसांचा बनावट एफआयआर (FIR), बनावट बँक पत्रे आणि चक्क इंटरपोलची (Interpol) बनावट रेड कॉर्नर नोटीस व्हॉट्सअॅपवर पाठवली. यामुळे त्या वृद्ध व्यक्तीला विश्वास बसला आणि तो प्रचंड घाबरला. यानंतर १२ फेब्रुवारी ते ७ मार्च २०२६ या काळात त्याला डिजिटल अरेस्ट करण्यात आले.
अन्यथा तुम्हाला तुरुंगात जावे लागेल
यावेळी आरोपींनी त्यांना ‘सिग्नल’ (Signal) मेसेजिंग अॅप डाऊनलोड करण्यास सांगितले. या अॅपद्वारे त्यांच्यावर २४ तास ऑडिओ आणि व्हिडीओ कॉलद्वारे पाळत ठेवली जात होती. पीडितेच्या पत्नीवरही नजर ठेवली जात असल्याचा आभास निर्माण करण्यात आला होता. यामुळे त्यांना कोणाकडेही मदत मागता आली नाही. यानंतर आरोपींनी तुमची बँक खाती आणि बचतीची रक्कम पडताळणीसाठी आरबीआयकडे (RBI) जमा करावी लागेल, अन्यथा तुम्हाला तुरुंगात जावे लागेल,” असे त्या वृद्ध व्यक्तीला सांगितले. आधी या प्रकरणामुळे घाबरलेला तो आणखी घाबरला.
या दबावाखाली येऊन त्या वृद्ध पीडिताने आरटीजीएस (RTGS) द्वारे एकूण १,५६,४५,००० रुपये आरोपींनी सांगितलेल्या विविध बँक खात्यांमध्ये वर्ग केले. मात्र यानंतर त्याला आपली फसवणूक झाल्याचे लक्षात आल्यानंतर पीडितेने अखेर बदलापूर पूर्व पोलीस ठाण्यात धाव घेतली. बदलापूर पोलिसांनी याप्रकरणी खंडणी (कलम ३०८-२), फसवणूक (कलम ३१८) आणि गुन्हेगारी कट (कलम ६१-२) यांसह माहिती तंत्रज्ञान कायद्यांतर्गत गुन्हा दाखल केला आहे. याप्रकरणी अद्याप कोणालाही अटक झालेली नसली तरी आरोपींचा बँक खात्यांचा तपास सुरु आहे.
दरम्यान डिजिटल अरेस्ट ही पूर्णपणे बेकायदेशीर प्रक्रिया आहे. कोणतीही पोलीस यंत्रणा अशा प्रकारे व्हिडिओ कॉलवर अटक करत नाही. अशा घटना घडल्यास त्वरित १९३० या सायबर हेल्पलाइनवर संपर्क साधावा, असे आवाहन पोलिसांनी केले आहे.
