Pradeep Purnekar Death Case: गणेशोत्सवात रेकी केली, संधी मिळताच हल्लेखोरांनी साधला डाव, प्रदीप पूर्णेकरांच्या मृत्यूपूर्वी रात्री नक्की काय घडलं?

ठाण्यातील मानपाडा परिसरातील उद्धव बाळासाहेब ठाकरे शिवसेना पक्षाचे विभागप्रमुख प्रदीप पुर्णेकर यांची काल रात्री निर्घृण हत्या करण्यात आली. मनोरमा नगर परिसरातील कार्यालयात असताना रात्री साडेनऊच्या सुमारासा अंदाधुंद गोळीबार करण्यात आला. हल्लेखोरांनी त्यांच्यावर शस्त्रानेही वार केल्याची माहिती समोर येत आहे. पुर्णेकर यांच्या कार्यालयाजवळील सीसीटीव्ही फुटेज समोर आले आहे. त्यात काही आरोप तोंडाला रूमाल बांधून स्कुटीवर आल्याचे समोर आले आहे. या प्रकरणात अजून एक व्हिडिओ समोर आला आहे. दरम्यान या हल्ल्याच्या काही दिवसांपूर्वी हल्लेखोरांनी परिसराची रेकी केल्याचे समोर आले आहे.

गणपतीत रेकी, मग डाव साधला

याप्रकरणी आता दोन सीसीटीव्ही फुटेज समोर आले आहे. प्रदीप पुर्णेकर यांचे बंधू जयनाथ पुर्णेकर यांनी याप्रकरणी माजी महापौर मिनाक्षी शिंदे आणि त्यांचे पती राजेंद्र शिंदे यांच्यावर या हत्येचामागे हात असल्याचा आरोप केला आहे. निळकंठ इमारतीत याविषयीची बैठक घेण्यात आली. त्यानंतर गणपतीच्या काळात हल्लेखोरांनी या परिसराची आणि कार्यालयाची रेकी केली. ते काही दिवस पाळत ठेऊन होते. त्यानंतर त्यांनी काल रात्री हल्ला केल्याचा आरोप जयराम पुर्णेकर यांनी केला. मानपाडा क्लस्टर डेव्हलपमेंट आणि राजकीय वर्चस्वातून ही हत्या झाल्याचा आरोप पुर्णेकर कुटुंबियांनी केला.

सात राऊंड फायर, छातीत लागल्या गोळ्या

जयनाथ पुर्णेकर यांनी सांगितले की, ते सर्व नवरात्रौत्सवासाठी परिसरात वर्गणी करत होते. त्यावेळी प्रदीप पुर्णेकर हे त्यांच्या कार्यालयात बसलेले होते. रात्री 9 वाजून 32 मिनिटांनी त्यांच्या कार्यालयात काहीजण आले. त्यांनी पिस्तूलातून सात राऊंड फायर केले. हे हल्लेखोर स्कुटीवर आल्याचे सीसीटीव्हीत दिसत आहे. आपला भाऊ समाजहितासाठी काम करत होता. या भागात ड्रग्ज विक्री होती होती. त्याला त्याचा विरोध होता. मी त्याला अनेकदा सांगायचो की, पोलिसांना सोबत घेऊन जात जा. त्याला धमकीचेही फोन यायचे. माजी महापौर मिनाक्षी शिंदे यांच्याशी झालेल्या वादातून ही हत्या झाल्याचा आरोप जयराम पुर्णेकर यांनी केला.

सात गोळ्या झाडल्याचा आवाज

या घटनेच्यावेळी नवीन सीसीटीव्ही फुटेज समोर आले आहे. एका औषधी दुकानातील सीसीटीव्ही कॅमेऱ्यात या परिसरातील घटना कैद झाली आहे. या नवीन फुटेजमध्ये आरोपींनी प्रदीप पुर्णेकर यांच्यावर सात गोळ्या झाडल्याचा आवाज स्पष्टपणे ऐकू येत आहे. गोळीबारानंतर गंभीर जखमी पुर्णेकर यांना नागरिक आणि कार्यकर्त्यांनी लागलीच रुग्णालयात दाखल केले. उपचारादरम्यान त्यांचा मृत्यू झाला. कापूरबावडी पोलिसांनी प्रकरणात सीसीटीव्ही आधारे दोन संशयितांना ताब्यात घेतले आहे. तर इतर आरोपींचा शोध सुरू आहे. या घटनेत एकूण पाच संशयित आरोपी असल्याची प्राथमिक माहिती समोर येत आहे.