Nashik| नगरपंचायत निवडणूक प्रचारासाठी 3 मंत्र्यांनी ठोकला तळ
नाशिक जिल्ह्यात 6 नगरपंचायतीसाठी 21 डिसेंबर रोजी मतदान होणार असून मतमोजणी 19 जानेवारी रोजी होणार आहे. त्यासाठी निवडणूक आयोगाने चोख तयारी केली आहे.
नाशिकः नाशिक जिल्ह्यात होणाऱ्या 6 नगरपंचायत निवडणुकीसाठी 3 मंत्र्यांनी तळ ठोकला आहे. महसूलमंत्री बाळासाहेब थोरात, कृषिमंत्री दादा भुसे आणि विधानसभा उपाध्यक्ष नरहरी झिरवाळ यांनी जिल्ह्यात प्रचाराची राळ उडवली आहे. नाशिक जिल्ह्यातील नगरपंचायतीसाठी 21 डिसेंबर रोजी मतदान होणार आहे. तर ओबीसी राखीव असणाऱ्या 11 जागांवर आता खुल्या प्रवर्गातून निवडणूक होत असल्याने मतमोजणी 19 जानेवारी रोजी होणार आहे. त्यासाठी निवडणूक आयोगाने चोख तयारी केली आहे.
या मंत्र्यांच्या सभा
नाशिक जिल्ह्यातील नगरपंचायतींची निवडणूक अटीतटीची होण्याची चिन्हे आहेत. त्यासाठी तीन मंत्री रिंगणात उतरले आहेत. महसूलमंत्री बाळासाहेब थोरात सुरगाणा येथे तळ ठोकून आहेत. कृषिमंत्री दादा भुसे हे पुढील तीन दिवस सुरगाणा, पेठ आणि कळवण तालुका पिंजून काढणार आहेत. या भागात त्यांच्या रॅली आणि सभा होणार आहेत. सोबतच विधानसभा उपाध्यक्ष नरहरी झिरवाळही जिल्ह्यात तळ ठोकून आहेत. विशेष म्हणजे या काळात ग्रामविकासमंत्री हसन मुश्रीफही नाशिकमध्ये असणार आहेत. एका विवाह सोहळ्यासाठी ते नाशिकला येणार आहेत.
भुजबळ विदर्भात
नाशिक जिल्ह्याची मुलखमैदानी तोफ म्हणून ओळखले जाणारे महाराष्ट्र राज्याचे अन्न, नागरी पुरवठा व ग्राहक संरक्षण मंत्री छगन भुजबळ मात्र सध्या विदर्भात प्रचार करण्यात गुंतले आहेत. भंडारा जिल्ह्यातील कारधा, लाखनी आणि साकोली येथील जिल्हा परिषद, पंचायत समिती आणि नगरपंचायत सार्वत्रिक निवडणुकीसाठी ते प्रचारसभा घेत आहेत.
21 डिसेंबर रोजी सुट्टी जाहीर
नाशिक जिल्ह्यात राज्य निवडणूक आयोग महाराष्ट्र शासन यांच्या निर्देशानुसार निफाड, पेठ, सुरगाणा, कळवण, देवळा व दिंडोरी नगरपंचायतीच्या सार्वत्रिक निवडणूकीसाठी 21 डिसेंबर 2021 रोजी मतदान होणार आहे. यादिवशी सदर नगरपंचायतीच्या क्षेत्रातील मतदानासाठी स्थानिक क्षेत्रात पूर्ण दिवस सुट्टी जाहीर केली असल्याचे आदेश जिल्हाधिकारी सूरज मांढरे यांनी जारी केले आहेत. या आदेशानुसार उद्योग, ऊर्जा व कामगार विभागात येणाऱ्या आस्थापना, कारखाने, दुकाने यांना 21 डिसेंबर 2021 रोजीची सुट्टी लागू रहाणार आहे.
दोन तासांची सवलत
अपवादात्मक परिस्थितीत नाशिक जिल्ह्यातील निफाड, पेठ,दिंडोरी, सुरगाणा, कळवण व देवळा नगरपंचायत कार्यक्षेत्रातील अधिकारी व कर्मचारी इत्यादींना मतदानाचा हक्क बजावण्यासाठी दोन तासांची सवलत देण्यात येणार असल्याचे जिल्हाधिकारी सूरज मांढरे यांनी जारी केलेल्या आदेशात नमूद करण्यात आले आहे.
इतर बातम्याः
Nashik | नाशिक सिटीझन फोरमचे कार्यक्षम नगरसेवक पुरस्कार जाहीर; बडगुजर, गिते, पगारे यांचा होणार गौरव