हॉटेलवर धडाधड धाडी टाकणाऱ्या तुकाराम मुंढेंचं आवडतं स्ट्रीट फूड कोणतं? म्हणाले त्याची चटकच लागली

तुकाराम मुंढे यांच्याकडे एफडीए अर्थात अन्न व औषध प्रशासन विभागाच्या आयुक्तपदाची जबाबदारी आल्यानंतर त्यांनी कामाचा झपाटा लावला आहे, राज्यात अनेक ठिकाणी एफडीएनं धाडी टाकल्या आहेत. अन्न पदार्थांमध्ये होणारी भेसळ उघड केली आहे. सध्या राज्यभरात तुकाराम मुंढे यांच्या कामाचं कौतुक होत आहे. दरम्यान आज  ‘पुणे लोकल’ आणि ‘माय जनसेवक’ यांच्या संयुक्त विद्यमाने बालगंधर्व रंगमंदिरात  ‘भविष्यवेध – संवाद भविष्याचा’ या उपक्रमांतर्गत ‘अनस्टॉपेबल तुकाराम’ या विशेष मुलाखतीचं आयोजन करण्यात आलं होतं. या मुलाखतीमध्ये बोलताना त्यांनी विविध प्रश्नांना उत्तरं दिली आहेत. या मुलाखतीमध्ये त्यांना तुमचं आवडतं स्ट्रीट फूड कोणतं असा प्रश्न देखील विचारण्यात आला होता.

नेमकं काय म्हणाले मुंढे?

मी कॉलेजला असताना पुणे विद्यापीठात चायनीज गाड्या असायच्या. पाषाण रोडला. मी विचार केला. तिथे जाऊन पाहावं का? माझं पहिलं चायनीज फूड मी तिथे खाल्लं. पण तोपर्यंत मला चायनीज फूड माहीत नव्हतं. आता भरपूर चायनीज फुडला डिमांड आहे. मी काही कारवाया केल्या. लोक म्हणतात आता चायनीज फूडवर कारवाई करा म्हणतात. आता पुढं लक्ष द्यायचं आहे.

आवडतं स्ट्रीट फूड असं म्हणणार नाही, आवडतं होतं. बऱ्याचदा कंडिशनमध्ये काही गोष्टी स्वीकाराव्या लागतात. मी कॉलेजला असताना प्रॉपर जेवण मिळत नव्हतं. मेस लावू शकत नव्हतो. तेव्हा अशी व्यवस्था केली होती. संभाजी नगरला रस्त्यावर ऑम्लेट पॉवच्या गाड्या असतात. अप्सरा, आंबा टॉकीजच्या समोर ऑम्लेटच्या गाड्या लागायच्या. मला ऑम्लेट माहीत नसायचं. तिथे पहिल्यांदा खाल्लं. भावाने गाडीवाल्याला सांगितलं हा जेव्हा येईल तेव्हा ऑम्लेट द्या. मी पैसे देईन. त्यामुळे ऑम्लेट खायची चटक लागली.

त्यावेळी फरसाण आणि केळी खायचो. तेव्हा तो प्रकार फेमस होता. आता मी खाल्लं तर दोन तासात मी बोलू शकणार नाही. आता विचार करतो. तेव्हाचं तेल कसं असेल. त्यावेळी स्ट्रीट फूड आवडायचं. आता कोणतं आवडत नाही. विशेष म्हणजे दोन महिन्यापासून मी खात नाही, असं यावेळी मुंढे यांनी म्हटलं आहे.