महाराष्ट्रात येताच अभिजीत दीपकेंची आंदोलनाबाबत मोठी घोषणा, प्लॅन केला जाहीर!
आम्ही डॉ. बाबासाहेब आंबेडकर, महात्मा गांधी यांच्या मार्गाने चालणारे आहोत. नरेंद्र मोदी हे हुकूमशाह आहेत. या हुकूमशाहाची हुकूमशाही संपवावीच लागणार आहे, असा हल्लाबोल अभिजीत दीपके यांनी केला.
Abhijeet Dipke : अभिजीत दीपके सध्या महाराष्ट्रात परतले आहेत. त्यांच्या आजीचे निधन झाल्याने ते दिल्लीतून महाराष्ट्रात आले आहेत. महाराष्ट्रात परतताच दीपके यांनी माध्यम प्रतिनिधींशी संवाद साधला. यावेळी काहीही झाले तरी आंदोलन थांबणार नाही, अशी महत्त्वाची भूमिका घेतली. तसेच पंतप्रधान नरेंद्र मोदी हे हुकूमशहा आहेत, अशी टीका केलीय. तसेच आम्ही शांत बसणार नाहीत. आम्ही घाबरणार नाहीत, असा निश्चच त्यांनी बोलून दाखवला.
प्रत्येकालाच रस्त्यावर उतरून लढावे लागणार
मुंबईत माजी मंत्री आदित्य ठाकरे आणि त्यांचे बंधू तेजस ठाकरे हे रस्त्यावर उतरून आंदोलन करत आहेत. मुंबईत शिवसेना भवनाच्या समोर शिवसैनिक आणि मुंबई पोलीस एकमेकांच्या समोर आल्याचे दिसले. पोलिसांनी शिवसैनिकांची धरपकड केली. दुसरीकडे काहीही झालं तरी माघार घेणारच नाही, असा निश्चय आदित्य ठाकरेंनी बोलून दाखवला. यावरही दीपके यांनी प्रतिक्रिया दिली. प्रत्येकालाच रस्त्यावर उतरून लढावे लागणार आहे. एकट्या ज्ञानेश कुमार यांना वाचवण्यासाठी नरेंद्र मोदी आणि केंद्रीय गृहमंत्री अमित शहा यांनी दिल्लीमध्ये आणीबाणी लादली. मेट्रो, बसेस सगळं बंद केलं. यांना आता घालवावेच लागेल, असा हल्लाबोल दीपके यांनी केला.
आम्ही काय दहशतवादी आहोत का?
आम्ही डॉ. बाबासाहेब आंबेडकर, महात्मा गांधी यांच्या मार्गाने चालणारे आहोत. नरेंद्र मोदी हे हुकूमशाह आहेत. या हुकूमशाहाची हुकूमशाही संपवावीच लागणार आहे. विद्यार्थ्यांना त्यांनी बंद करून टाकलं. भारतात कधीही विमानातूनच अटक केलेली नाही. आम्ही काय दहशतवादी आहोत का? असा बोचरा सवालही दीपके यांनी केला.
दिल्ली पोलीस अशा प्रकारे खून करायला…
त्यांनी अख्खा देश अडाणी यांना विकलाय. पोलीस तरुणांना मारत आहेत. नरेंद्र मोदी यांच्या आदेशाने पोलिसांना मुलांचा खूनही करावा लागेल. दिल्ली पोलीस अशा प्रकारे खून करायला तयार आहेत का? असा तिखट सवाल दीपके यांनी केला. जेव्हा देश गुंड चालवतात तेव्हा गुंडांचेच प्रमोशन होते, असेही दीपके म्हणाले.
त्यांना वाटले मी घाबरेल, पण मी….
दरम्यान, दीपके यांच्या राजीनाम्यासाठी आंदोलन सुरूच राहील. आम्ही माघार घेणार नाही. मला बेकायदेशीरित्या ताब्यात घेण्यात आले. त्यांना वाटले मी घाबरेल. पण मी घाबरणार नाही. मोदी यांच्यासारखे हुकूमशाहा येतील आणि जातील. पण देश असाच राहणार आहे, असा संतापही त्यांनी व्यक्त केला.
