मुख्यमंत्र्यांच्या हातावर चाबकाचे फटके कोण मारतंय? काय आहे हा प्रकार? व्हिडिओ Viral का होतोय?

Image Credit source: ANI

रांचीः छत्तीसगडचे मुख्यमंत्री भूपेश बघेल(Bhupesh Baghel) यांचा एक व्हिडिओ सध्या सोशल मीडियावर (Social Media) वेगाने व्हायरल होतोय. या व्हिडिओत मुख्यमंत्री भूपेश बघेल स्वतःच्या हातावर चापकाचे फटके मारून घेतायत. छत्तीसगडमधील (Chattisgadh) दुर्ग जिल्ह्यातील हा व्हिडिओ आहे.

आदिवासी बहुल अशा छत्तीसगडमधली ही एक प्रथा आहे. येथील गौरी-गौर पूजेच्या निमित्त आयोजित एका कार्यक्रमात छत्तीसगडचे मुख्यमंत्री भूपेश बघेल सहभागी झाले. यातील एका प्रथेनुसार, प्रत्येकजण आपल्या हातावर चापकाचे फटकारे मारून घेतात आणि ते सहन करतात.

सध्या व्हायरल होणाऱ्या व्हिडिओत दिसतंय, मुख्यमंत्री भूपेश बघेल गर्दीत उभे आहेत. त्यांनी हात पुढे केलाय. एक व्यक्ती त्यांच्या मनगटावर सपासप् चाबकाचे फटके मारतोय. यावेळेला मुख्यमंत्र्यांनी त्यांचा हात अगदी ताठच ठेवलाय.

पाच फटके मारणाऱ्या व्यक्तीसमोर मुख्यमंत्री बघेल यांनी हातही जोडलेले दिसतायत. मुख्यमंत्री बघेल दरवर्षीच या पूजेला आवर्जून उपस्थित राहतात.

मुख्यमंत्री भूपेश बघेल आज दुर्ग जिल्ह्यातील गौरा गौरी पूजेत सहभागी झाले. या पूजेदरम्यान अशा प्रकारे चाबकाचे फटकारे मारून घेतल्याने अनिष्ट गोष्टी टळतात. राज्यात आनंदीआनंद राहतो, अशी मान्यता आहे.

ही प्रथा पार पाडल्यानंतर मुख्यमंत्री भूपेश बघेल यांनी दिवाळीनिमित्त सर्व नागरिकांना शुभेच्छा दिल्या. ते म्हणाले, परमेश्वर तुमच्या आयुष्यात दरवर्षी आनंद घेऊन येवो. तुमचे आयुष्य असेच उजळून निघत राहो.

भूपेश बघेल म्हणाले, गौरी गौरा पूजेत मी दरवर्षी सहभागी होतो. येथील नगरप्रदक्षिणेतही ते सहभाग नोंदवतात.