राष्ट्रवादी विलीनीकरणाच्या चर्चेवर शरद पवारांची भूमिका; सुनील तटकरे म्हणाले…

राज्याच्या राजकारणात राष्ट्रवादी काँग्रेसच्या संभाव्य विलीनीकरणाबाबत आणि एनडीएमध्ये सामील होण्याबाबत सुरू असलेल्या चर्चांना राष्ट्रवादी काँग्रेसचे अध्यक्ष शरद पवारांनी पूर्णविराम दिला आहे. यायचं असेल तर आमच्यात या, आम्ही कुणासोबत जाणार नाही असे स्पष्ट शब्दांत पवारांनी आपली भूमिका मांडली. त्यामुळे त्यांच्या नेतृत्वाखालील राष्ट्रवादी काँग्रेस पक्ष कुणासोबतही विलीन होणार नाही, हे त्यांनी अधोरेखित केले. यापूर्वी अजित पवार हयात असताना दोन्ही राष्ट्रवादी गटांच्या विलीनीकरणाची चर्चा होती, मात्र त्यांच्या निधनानंतर ती रखडली.

मध्यांतरी शरद पवारांची राष्ट्रवादी एनडीएमध्ये सामील होण्याच्याही चर्चा होत्या, आणि केंद्रातील भाजपने विलीनीकरण करूनच एनडीएत यायची अट घातल्याचे बोलले जात होते. या सर्व चर्चांवर पवारांनी आता भूमिका स्पष्ट केली आहे. त्यांनी पक्षाचा प्रमुख म्हणून सांगितले की, राष्ट्रवादी पक्ष शरद पवारांच्या नेतृत्वाखालीलच राहील आणि तो मजबूत केला जाईल. या वक्तव्यावर सुनील तटकरेंनी पवार साहेब देशाचे नेते आहेत, त्यांनी व्यक्त केलेल्या मतावर मी काही बोलणार नाही अशी प्रतिक्रिया दिली. सध्याच्या परिस्थितीत विरोधी पक्षात बसणे अधिक योग्य असल्याचेही पवारांनी नमूद केले.