जगातील असे देश ज्यांनी कधीच युद्ध लढलं नाही, आहेत प्रचंड श्रीमंत
जगात असे देखील काही देश आहेत, ज्यांनी आतापर्यंत एकदाही कोणतीही लढाई लढलेली नाहीये. हे देश प्रचंड श्रीमंत आहेत. अशाच काही देशांबद्दल आज आपण जाणून घेणार आहोत.
सध्या अमेरिका इस्त्रायल आणि इराणमध्ये भीषण युद्ध सुरू आहे. या युद्धामुळे मध्य पूर्वेत प्रचंड तणाव निर्माण झाला आहे. या युद्धामुळे केवळ या तीन देशांचंचं नुकसान झालं असं नाही, तर या युद्धाचा संपूर्ण जगाला मोठा फटका बसला आहे. जगभरात इंधन टंचाई जाणवत आहे. भारत देखील या समस्येमधून सुटू शकला नाही. युद्ध कोणतंही असो त्या युद्धामध्ये नुकसान हे होतच असतं. जगातील जवळपास सर्वच देशांनी कधी नं कधी युद्धाचा सामना केला आहे. युद्धामुळे होणाऱ्या नुकसानाची झळ सोसली आहे. मात्र या जगामध्ये असेही काही देश आहेत, ज्यांनी आतापर्यंत एकदाही कोणासोबत युद्ध केलेलं नाही, हे देश खूप शांत पण तेवढेच श्रीमंत देखील आहेत, अशाच काही देशांबद्दल आज आपण माहिती जाणून घेणार आहोत.
मॅरिनो – मॅरिनो हा जगातील एक छोटा देश आहे. या देशाने आतापर्यंत आपल्या इतिहासामध्ये एक देखील युद्ध लढलेलं नाहीये. दुसऱ्या महायुद्धाच्यावेळी देखील या देशानं तटस्थ राहण्याचा निर्णय घेतला होता. या देशावर त्यावेळी जर्मनीच्या सैन्यांनी काही काळ ताबा मिळवला होता. मात्र त्यानंतर जर्मनीने या देशाला आपल्या ताब्यातून मुक्त केलं. 1944 मध्ये जर्मनीने या देशावर ताबा मिळवला होता. जर्मनीने या देशाचा उपयोग आपल्या शत्रू राष्ट्रांवर हल्ला करण्यासाठी केला. कारण या देशाची भौगोलिक परिस्थिती युद्धासाठी अनुकूल आहे. या देशाचं क्षेत्रफळ केवळ 61 वर्ग किलोमीटर एवढंच आहे. तर या देशाची लोकसंख्या केवळ 33,000 ते 34,000 एवढीच आहे. मात्र येथील लोक प्रचंड श्रीमंत आहेत. या देशाचा समावेश हा जगातील श्रीमंत देशांच्या यादीमध्ये होतो.
आयसलँड – आयसलँड हा देखील असा देश आहे, ज्याने आतापर्यंत कधीही कोणत्याही युद्धात सहभाग घेतलेला नाहीये. कोणतीही लढाई लढलेली नाहीये. डोनाल्ड ट्रम्प यांच्याकडून या देशावर ताबा मिळवण्याचा प्रयत्न झाला आणि हा देश अचानक चर्चेमध्ये आला. आयसलँडला 1944 साली स्वातंत्र्य मिळालं. हा देखील एक श्रीमंत देश असून, येथील लोकांचं दरडोई उत्पन्न हे जवळपास 88,000 डॉलर इतकं आहे. हा देश प्रचंड शांत आहे. तसेच नैसर्गिक सौंदर्यासाठी ओळखला जातो.
लिक्टेनस्टीन – या यादीमध्ये तिसरा देश आहे तो म्हणजे लिक्टेनस्टीन या देशाने देखील आतापर्यंत कोणतंही युद्ध केलेलं नाही, येथील लोक देखील प्रचंड श्रीमंत असून, नागरिकांचं सरासरी वार्षिक उत्पन्न हे 2 लाख डॉलर एवढं प्रचंड आहे.
