जंतरमंतरवर मोठा राडा, इंडिया आघाडीच्या आंदोलनादरम्यान पोलीस अधिकाऱ्याला मारहाण, तपास यंत्रणा लागली कामाला

DELHI POLICE

दिल्लीच्या जंतरमंतरवर मागील दोन दिवसांपासून निवडणूक आयोगाच्या विरोधात आंदोलन सुरू आहे. इंडिया आघाडीच्या आंदोलनादरम्यान पोलीस कर्मचाऱ्यांना मारहाण झाल्याचा आरोप करण्यात आहे. पोलिसांना डिवचल्याचे अनेक व्हिडिओ सोशल मीडियावर व्हायरल होत आहे. यातील कथित व्हिडिओमध्ये पोलीस अधिकारी आणि कॉन्स्टेबलला मारहाण झाल्याचे दिसत आहे. यानंतर पोलिसांकडून मारहाण करणाऱ्या आंदोलकांचा शोध सुरू केला आहे. जंतर-मंतरवरील विविध ठिकाणी पोलिसांना मारहाण झाल्याचा दावा करण्यात येत आहे.

पोलिसांच्या माहितीनुसार, पोलीस कर्मचाऱ्यांना मारहाण करणाऱ्यांना आंदोलकांच्या विरोधात FIR दाखल होण्याची शक्यता आहे. सरकारी कर्मचाऱ्यांवर हल्ला करणे, सरकारी कर्तव्यात अडथळा आणणे, कर्तव्य बजावताना अडथळा निर्माण करणे यांसारख्या गुन्ह्याचा समावेश असणार आहे. पोलिसांकडून चौकशी केली जाणार आहे.

इंडिया आघाडीच्या आंदोलनादरम्यान पोलिसांना मारहाण झाल्याचा आरोप 

जंतरमंतरवर इंडिया आघाडीदरम्यान ही घटना घडल्याचे सांगितले जात आहे. विरोधी पक्षाचे नेते निवडणूक आयुक्तांच्या विरोधात आंदोलन करत होते. एसआयआर प्रक्रियेच्या विरोधात त्यांनी आंदोलन केलं. या आंदोलनादरम्यान राहुल गांधी आणि इतर खासदार हे पोलिसांचे बेरिकेट्स ओलांडून जात होते. तर यावेळी राहुल गांधींनी बॅरिकेट्सला लागून असलेला गेट देखील उघडण्याचा प्रयत्न केला. पोलिसांनी आंदोलकांना रोखले. त्यावेळी पोलीस आणि आंदोलकांमध्ये झटापट झाली.

काँग्रेस खासदारांचा दिल्ली पोलिसांवर मारहाणीचा आरोप 

पोलिसांनी लाठीचार्ज करून अनेक नेत्यांना जखमी केल्याचाही काँग्रेसचा आरोप आहे. काही खासदारांनीही पोलिसांवर आरोप केले आहेत. पोलिसांनी महिलांना वाईट वागणूक दिल्याचाही आरोप करण्यात आला.यावेळी पोलिसांनी राहुल गांधी, प्रियंका गांधी आणि इतर नेत्यांना ताब्यात घेतलं होतं. याआधी दिल्ली पोलिसांनी मंगळवारी आंदोलनावरून एफआयआर दाखल केला आहे. पोलिसांच्या दाव्यानुसार, इंडिया आघाडीने संसदेपासून निवडणूक आयोगाच्या कार्यालयापर्यंत मोर्चा काढण्याची योजना आखली होती. त्यासाठी काँग्रेसने परवानगी घेतली नव्हती, असा दावा पोलिसांचा दावा आहे. काँग्रेसने आज देखील संपूर्ण देशात निवडणूक आयोगाच्या विरोधात आंदोलन करण्याचा निर्णय घेतला आहे.