त्रिशा कृष्णनवर अश्लील टिप्पणी, थेट घरातून घेतलं ताब्यात; आता माजी उपमुख्यमंत्री म्हणतायत “माझं काय चुकलं?”

अभिनेत्री त्रिशा कृष्णनबद्दल आक्षेपार्ह टिप्पणी करणं डीएमके नेते आणि माजी उपमुख्यमंत्री उदयनिधी स्टॅलिन यांना चांगलंच महागात पडलं आहे. भरसभेत त्रिशाबद्दल दुहेरी अर्थाची अश्लील टिप्पणी करणाऱ्या उदयनिधी स्टॅलिन यांना थेट त्यांच्या निवासस्थानातून ताब्यात घेण्यात आलं आहे. पोलिसांनी ताब्यात घेतल्यानंतर त्यांची पहिली प्रतिक्रिया समोर आली आहे. मी त्रिशाचं नावसुद्धा घेतलं नाही, असं स्पष्टीकरण त्यांनी दिलं आहे. उदयनिधी हे तंजावरमध्ये कावेरी पाणीप्रश्नाशी संबंधित आंदोलनाचं नेतृत्व करत होते. त्यावेळी त्यांनी सभेत त्रिशाबद्दल नाव न घेता टिप्पणी केली होती. त्यांचा हा व्हिडीओ व्हायरल होताच सर्वच स्तरांतून टीका होऊ लागली.

ताब्यात घेतल्यानंतर एका वाहिनीशी बोलताना उदयनिधी स्टॅलिन म्हणाले, “मी काही चुकीचं म्हटलं का? मी मुख्यमंत्र्यांशिवाय कोणा दुसऱ्याचं नावसुद्धा घेतलं नाही. मी काहीच चुकीचं केलं नाही. यापेक्षा जास्त मला यावर काहीच बोलायचं नाही.” उदयनिधी स्टॅलिन यांना पोलिसांनी चौकशीसाठी ताब्यात घेतलं असून यावेळी घटनास्थळी बराच गोंधळ निर्माण झाला होता.

स्टॅलिन पोलिसांच्या ताब्यात

#WATCH | Tamil Nadu | DMK leader and LoP Udhayanidhi Stalin detained by Police from his Chennai residence, following an FIR against him over his alleged defamatory remarks against CM Vijay pic.twitter.com/d1evXEG2By

— ANI (@ANI) August 4, 2026

तंजावरमधील सभेत उदयनिधी हे तमिळनाडूचे मुख्यमंत्री सी. जोसेफ विजय उर्फ थलपती विजय यांच्यावर निशाणा साधत होते. यादरम्यान प्रेक्षकांमधून “त्रिशा, त्रिशा..” अशी घोषणाबाजी सुरू झाली. त्रिशाचं नाव ऐकताच उदयनिधी हसले आणि म्हणाले, “पाणी इतरत्र कुठे पोहोचू दे किंवा न पोहोचू दे.. पण तिथे मात्र आवर्जून पोहोचलं पाहिजे.. मी कावेरीबद्दल म्हणत होतो.” या टिप्पणीनंतर टीव्हीकेनं त्यांच्याविरोधात थेट राष्ट्रीय महिला आयोगाकडे तक्रार दाखल करत त्यांच्याविरोधात कारवाईची मागणी केली.

तमिळनाडू भाजपचे मुख्य प्रवक्ते नारायणन तिरुपती यांनी उदयनिधी स्टॅलिन यांच्या वादग्रस्त वक्तव्यावर आक्षेप घेतला आणि त्यांच्या तुरुंगवासाची मागणी केली. ते म्हणाले, “उदयनिधी यांनी केलेली दुहेरी अर्थाची वक्तव्ये ही अत्यंत लज्जास्पद, अश्लील आणि घृणास्पद आहेत. कोणत्याही सुसंस्कृत व्यक्तीने सार्वजनिक व्यासपीठावर अशी असभ्य भाषा वापरू नये.”

तमिळनाडूचे मुख्यमंत्री थलपती विजय आणि अभिनेत्री त्रिशा कृष्णन यांच्यातील नातं कायमच चर्चेत राहिलं आहे. विजय यांची पत्नी संगीताने घटस्फोटासाठी अर्ज करताना त्यांच्यावर एका अभिनेत्रीसोबत विवाहबाह्य संबंध असल्याचा आरोप केला होता. तेव्हापासून त्रिशाचं नाव विजय यांच्यासोबत जोडलं जात आहे. विजय यांच्या शपथविधी सोहळ्यातही पत्नी-मुलांची अनुपस्थिती आणि त्रिशाच्या उपस्थितीने सर्वांचं लक्ष वेधलं होतं.