लेहमध्ये हेलिकॉप्टर क्रॅश! लष्कराचे ३ अधिकारी थोडक्यात बचावले; अपघातानंतर मेजर जनरलचा फोटो व्हायरल
लेहमध्ये हेलिकॉप्टर अपघातातून भारतीय लष्कराचे तीन अधिकारी थोडक्यात बचावले. या अपघातामुळे चीता हेलिकॉप्टरच्या सुरक्षेबद्दल चिंता वाढली आहे.
लडाखमधील लेहजवळील डोंगराळ तांगस्ते (Tangtse) भागात झालेल्या एका हेलिकॉप्टर अपघातात भारतीय लष्कराचे ३ अधिकारी थोडक्यात बचावले आहेत. लष्कराच्या जुन्या 'चीता' (Cheetah) ताफ्यातील या हेलिकॉप्टरमध्ये एक लेफ्टिनंट कर्नल, एक मेजर आणि एक मेजर जनरल प्रवास करत होते. हा अपघात २० मे रोजी झाला असून, लष्करी अधिकाऱ्यांनी आज (२३ मे) सकाळी या वृत्ताला अधिकृत दुजोरा दिला आहे.
सिंगल-इंजिन असलेल्या या हेलिकॉप्टरचे उड्डाण लेफ्टिनंट कर्नल आणि मेजर करत होते, तर 'थर्ड इन्फंट्री डिव्हिजन'चे जनरल ऑफिसर कमांडिंग मेजर जनरल सचिन मेहता यात प्रवासी म्हणून बसले होते. या अपघातात तिन्ही अधिकारी जखमी झाले आहेत. अपघातानंतर मेजर जनरल मेहता आणि इतर दोन अधिकाऱ्यांचा एक सेल्फी सध्या सोशल मीडियावर प्रचंड व्हायरल होत आहे.
व्हायरल झालेल्या फोटोमध्ये हे अधिकारी पूर्णपणे क्षतीग्रस्त झालेल्या हेलिकॉप्टरशेजारी खडकांवर बसलेले दिसत आहेत. तिथले डोंगराळ वातावरण आणि जुन्या चीता हेलिकॉप्टरची अवस्था पाहता, या अधिकाऱ्यांचा जीव वाचणे हा एक चमत्कारच मानला जात आहे. या अपघाताच्या कारणांची अधिकृत चौकशी करण्याचे आदेश देण्यात आले आहेत. लेहमधील या अपघातामुळे चीता हेलिकॉप्टर्सच्या सुरक्षेबाबतची चिंता आणखी वाढली आहे. या ताज्या घटनेमुळे त्यांच्या सुरक्षिततेवर पुन्हा एकदा नव्याने चर्चा सुरू झाली आहे.
ही हेलिकॉप्टर्स पहिल्यांदा १९७० च्या दशकात लष्कराच्या ताफ्यात समाविष्ट करण्यात आली होती. १९८४ मध्ये सियाचीन ग्लेशियरवर पाकिस्तानी सैनिकांशी लढण्यासाठी राबवण्यात आलेल्या 'ऑपरेशन मेघदूत'मध्येही या हेलिकॉप्टर्सचा सहभाग होता. मात्र, गेल्या काही वर्षांत या हेलिकॉप्टर्सचे अनेक अपघात झाले आहेत.
या आधी झालेल्या अपघातांमध्ये अनेक वैमानिकांना आपला जीव गमवावा लागला आहे. त्यामुळे आता चीता हेलिकॉप्टर्सच्या ताफ्याला हळूहळू सेवेतून निवृत्त केले जात आहे. त्याच्या जागी आता सरकारी मालकीच्या 'हिंदुस्तान एरोनॉटिक्स लिमिटेड' (HAL) द्वारे निर्मित स्वदेशी 'लाईट युटिलिटी हेलिकॉप्टर' (LUH) समाविष्ट केले जात आहेत.
