अमिताभ बच्चन-धोनी-रजनीकांतसारखे सेलिब्रिटी हेअरकटसाठी किती फी देतात?
हेअरस्टाइल किंवा हेअरकटमुळे एखाद्याचा लूक पूर्णपणे बदलू शकतो. बॉलिवूड, टॉलिवूड किंवा क्रिकेट क्षेत्र असो.. अनेक सेलिब्रिटी त्यांचा हेअरकट कोणाकडे करतात माहितीये का? त्यांच्या एका हेअरस्टाइलसाठी लाखो रुपये खर्च केले जातात.
स्त्री असो किंवा पुरुष.. हेअर स्टाइल आणि हेअरकटमुळे प्रत्येकाचा लूक पूर्णपणे बदलू शकतो. मोठमोठ्या सेलिब्रिटींची हेअरस्टाइल त्यांचे असंख्य चाहते फॉलो करतात. मग अशावेळी या सेलिब्रिटींची हेअरस्टाइल आणि हेअरकट अत्यंत अनोख्या पद्धतीने करण्याची जबाबदारी स्टायलिस्टवर असते.
हे सेलिब्रिटी त्यांचा हेअरकट कुठे करत असतील, असा प्रश्न आजवर अनेकांना पडला असेल. त्याचं उत्तर आज आम्ही तुम्हाला देणार आहोत. सेलिब्रिटींच्या हेअरस्टाइलसाठी किती पैसे आकारले जातात, तेसुद्धा जाणून घ्या..
क्रिकेट आणि चित्रपटसृष्टीतील बरेच सेलिब्रिटी हे ज्या हेअर स्टायलिस्टकडे जातात, त्याचं नाव आहे आलिम हकीम. बॉलिवूड असो किंवा टॉलिवूड.. इंडस्ट्रीतील जवळपास 98 टक्के सेलिब्रिटींची हेअर स्टायलिंग आलिम करतो.
'वॉर'मधील हृतिक रोशन, 'कबीर सिंह'मधील शाहिद कपूर, 'बाहुबली'मधील प्रभास, 'अॅनिमल'मधील रणबीर कपूर आणि बॉबी देओल, 'जेलर'मधील रजनीकांत यांची हेअर स्टायलिंग आलिमनेच केली आहे.
अजय देवगण, विराट कोहली, श्रेयस अय्यर, महेंद्र सिंह धोनी, महेश बाबू, रणवीर सिंह, रोहित शर्मा, आनंद पिरामल, अर्जुन कपूर यांसह अनेक सेलिब्रिटी आलिम हकीमचे क्लाएंट आहेत.
28 मार्च 1984 रोजी आलिमचे वडील हकीम कॅरानवी यांचं निधन झालं होतं. त्यावेळी आलिम 9 वर्षांचा होता. हकीम कॅरानवी हे 1960 पासून 80 पर्यंत सर्वोत्कृष्ट हेअरड्रेसर होते. त्यांनी हेअर स्टायलिंग क्षेत्राला एका नव्या उंचावर नेलं होतं.
वडिलांच्या निधनानंतर आलिमने वयाच्या नवव्या वर्षापासूनच काम शिकायला सुरुवात केली. शिकता शिकता वयाच्या 16 व्या वर्षापासून त्याने हेअर स्टायलिस्ट म्हणून काम करायला सुरुवात केली.
आलिमच्या वडिलांनीच अमिताभ बच्चन यांची प्रसिद्ध हेअरस्टाइल केली होती. दिलीप कुमारपासून सुनील दत्त, अनिल कपूर हे सर्वजण त्यांचे क्लाएंट होते. ब्रूस ली, मोहम्मद अली, टोनी क्रेग, रिचर्ड हॅरिस, क्रेझी बॉइज या सर्वांची हेअर स्टायलिंग आलिमच्या वडिलांनी केली होती.
जेव्हा आलिमने मिठीबाई कॉलेजमध्ये प्रवेश घेतला, तेव्हा तो करिअरमध्ये नेमकं काय करावं या संभ्रमात होता. मात्र वयाच्या सोळाव्या वर्षी त्याने निर्णय घेतला की वडिलांच्या हकीम ब्रँडला पुढे घेऊन जायचं.
आलिमने त्याच्या घराच्या बाल्कनीमध्ये पंखा, बेसिन आणि कटिंग खुर्ची लावून कामाची सुरुवात केली. आपल्या मेहनत आणि कौशल्याच्या जोरावर त्याने आज मोठा हेअर ड्रेसिंग स्टुडिओ उभारला आहे.
आलिम हकीम एका हेअर स्टायलिंग आणि हेअरकटसाठी कमीत कमी एक लाख रुपये घेतो. हेअरस्टायलिंग आणि त्यासाठी लागणाऱ्या वेळेनुसार ही फी बदलते. कारण कोणताही लूक करायचा असेल तर त्याला अनेकदा सहा-सहा महिन्यांचा कालावधी लागतो.
