मुलांमध्ये शिकण्याचे ज्ञान आणि कौशल्ये विकसित करण्यासाठी शाळेत कठोर परिश्रम करणे खूप महत्वाचे असते. पण तुम्हाला माहित आहे का की ज्या महिन्यात तुमच्या मुलाचा जन्म झाला त्या महिन्याचाही मुलांच्या विकासावर मोठा प्रभाव पडतो. ही एक आश्चर्याची बाब आहे. पण एका संशोधनासाठी गोळा करण्यात आलेल्या डेटामधून ही माहिती समोर आली आहे.
एका अहवालानुसार, एडटेक तज्ज्ञांनी ॲटम लर्निंग द्वारे एकत्रित केलेल्या डेटानुसार, नोव्हेंबरमध्ये जन्मलेली मुले ही प्राथमिक शाळेतील शैक्षणिक क्षेत्रात अधिक चांगली कामगिरी करतात. तर जुलैमध्ये जन्मलेल्या मुलांची कामगिरी सुमार असते, अशी माहिती समोर आहे.
हे संशोधन 6 वर्षांच्या मुलांवर करण्यात आले आहे, ज्यांना 5000 पैकी गुण देण्यात आले होते. या संशोधनानुसार, सप्टेंबरमध्ये जन्मलेली मुले शाळेत अव्वल स्थान मिळवतात तर ऑगस्टमध्ये जन्मलेली मुलं अभ्यासासाठी खूप जास्त संघर्ष करतात.
सामान्यत: शरद ऋतूमध्ये जन्माला आलेली मुलं ही त्यांच्या समवयस्कांना शैक्षणिकदृष्ट्या मागे टाकतात, तर उन्हाळ्यात जन्मलेली मुले - ज्यांची शाळा चौथ्या वर्षानंतर सुरू होते, ती अभ्यासात अनेकदा मागे पडतात, असे संशोधकांना आढळून आले.
गणित, इंग्रजी, विज्ञान, व्हर्बल रिझनिंग याद्वारे मुलांची कामगिरी मोजण्यात आली. नोव्हेंबरमध्ये जन्मलेल्या मुलांना 3046 गुण देण्यात आले. त्याचबरोबर सप्टेंबरच्या मुलांना 3045 आणि जुलैच्या मुलांना 2932 गुण मिळाल्याचे यामध्ये नमूद करण्यात आले आहे.