IPL 2021 | चेन्नई सुपर किंग्स विरुद्ध पंजाब किंग्स आमनेसामने, ‘या’ 4 खेळाडूंना विक्रम करण्याची संधी
आयपीएलच्या 14 व्या मोसमात (ipl 2021) आज पंजाब (pbks) किंग्स विरुद्ध चेन्नई सुपर किंग्स (csk) यांच्यात सामना खेळवण्यात येणार आहे.
आयपीएलच्या 14 पर्वातील 8 वा सामना पंजाब किंग्स विरुद्ध चेन्नई सुपर किंग्स यांच्यात खेळवण्यात येणार आहे. या सामन्यात दोन्ही संघांतील 4 खेळाडूंना काही विक्रम आपल्या नावे करण्याची नामी संधी आहे.
मिस्टर आयपीएल सुरेश रैना. चेन्नईच्या सुरेश रैनाला या सामन्यात 500 चौकारांचा टप्पा पूर्ण करण्याची संधी आहे. यासाठी रैनाला अवघ्या 4 फोरची आवश्यकता आहे. तसेच 200 सिक्ससाठीही रैनाला 2 षटकारांची गरज आहे. रैनाने या मोसमाची सुरुवात अर्धशतकाने केली. त्यामुळे या सामन्यात रैनाने अशीच कामगिरी केल्यास तो हे विक्रम नक्कीच आपल्या नावे करेल.
चेन्नईचा वेगवान गोलंदाज दीपक चाहरला आयपीएल कारकिर्दीतील 50 विकेट्स पूर्ण करण्याची संधी आहे. यासाठी दीपकला 2 विकेट्सची आवश्यकता आहे. त्यामुळे 2 विकेट्स घेताच दीपकच्या आयपीएलमध्ये 50 विकेट्स पूर्ण होतील.
'पालघर एक्सप्रेस' शार्दुल ठाकूरलाही 50 विकेट्सचा टप्पा गाठण्यासाठी 2 बळींची गरज आहे. चेन्नईच्या शार्दुलने आतापर्यंत आयपीएलमध्ये एकूण 48 फलंदाजांना बाद केलं आहे. त्यामुळे दीपकसह शार्दुल विकेट्सचं अर्धशतक झळकावतो का, याकडे सर्वांचेच लक्ष असणार आहे.
पंजाबचा अष्टपैलू खेळाडू मोइसेस हेनरिकेसला आयपीएलमधील 1000 धावा पूर्ण करण्याची संधी आहे. मोईसेनेने आतापर्यंत एकूण 57 सामन्यात 128.17 च्या स्ट्राईक रेटने 969 धावा केल्या आहेत. मोईसेसने 31 धावा करताच त्याच्या नावे 1000 धावांची नोंद होईल.