42 व्या वर्षी लोकप्रिय अभिनेत्री बनणार आई.. पारंपारिक पद्धतीने झालं डोहाळेजेवण ! गोड फोटो समोर
लोकप्रिय अभिनेत्री करिश्मा तन्नाच्या डोहाळेजेवणाचे फोटो आणि व्हिडिओ सोशल मीडियावर व्हायरल झाले आहेत. पती वरुण बंगेरासोबत तिने तुळू रितीरिवाजानुसार हा सोहळा साजरा केला. सुंदर साडी परिधान केलेली करिश्मा, तसेच तिच्या चेहऱ्यावरील प्रेग्नन्सी ग्लोने लक्ष वेधून घेतलं. चाहत्यांनी अभिनंदनाचा वर्षाव करत या जोडप्याच्या आनंदात भर घातली . लवकरच त्यांच्या घरी चिमुकला पाहुणा येणार आहे.
लोकप्रिय टीव्ही अभिनेत्री करिश्मा तन्ना लवकरच आई होणार आहे. करिश्मा आणि तिचा पती वरुण बंगेरा यांनी एप्रिल महिन्यात ही आनंदाची बातमी शेअर केली होती आणि नुकतेच या जोडप्याच्या घरी डोहाळेजेवणाचा कार्यक्रम पार पडला. करिश्माच्या डोहाळेजेवणाच्या कार्यक्रमाचे फोटो आणि व्हिडिओ आता सोशल मीडियावर व्हायरल होत आहेत. (All Photos : Instagram / Social Media)
करिश्मा तन्नाचा डोहाळेजेवण सोहळा तुलू रितीरिवाजानुसार पार पडला, ज्याचे फोटो तिचा पती वरुणने सोशल मीडियावर शेअर केले आहेत. करिश्मा आणि वरुणचे कुटुंबीय, जवळचे नातेवाईक आणि मित्र या विशेष प्रसंगी उपस्थित होते आणि त्यांनी या जोडप्यावर आशीर्वाद व प्रेमाचा वर्षाव केला.
करिश्मा तन्ना तिच्या डोहाळेजेवणासाठी सुंदर साडी नेसून अत्यंत गोड दिसत होती. तिचा पती, वरुण, यानेही पारंपरिक कुर्ता-पायजमा परिधान केला होता. त्यांच्या गरात फुलांची सुंदर सजावट तर होतीच, पण हास्याने भरलेल्या त्या घरात पॉझिटिव्ह व्हाईब्ज होत्या.
तुळू परंपरेनुसार झालेल्या या कार्यक्रमाच्या शेअर केलेल्या व्हिडिओमध्ये, अभिनेत्री तिच्या पतीसोबत विधींनुसार पूजा करताना दिसली. त्या दोघांनी मिळून सर्व विधी पार पाडले. या सोहळ्यादरम्यान त्यांचे कुटुंबीयही उपस्थित होते आणि संपूर्ण घर 'हर हर महादेव'च्या जयघोषाने दुमदुमून गेले होते.
तिच्या पारंपरिक तुलू डोहाळेजेवणासाठी, करिश्माने खास साडी नेसली होती आणि हातांवर मेहंदी, दागिने व केसांत गजरा लावून तिने लूक पूर्ण केला होता. फोटोंमध्ये करिश्माच्या चेहऱ्यावरची प्रेग्नन्सी ग्लो अगदी स्पष्टपणे दिसत होता आणि वरुणच्या चेहऱ्यावरही वडील होणार असल्याचा आनंद झळकत होता.
सोशल मीडियावर शेअर केलेल्या फोटोंमध्ये त्या दोघांच्या चेहऱ्यावरचा आनंद पाहून, त्यांच्या चाहत्यांनीही भरभरून प्रतिक्रिया दिल्या. करिश्मा आणि वरुणने सोशल मीडियावर बेबी शॉवरचे फोटो शेअर करताच, ते वाऱ्याच्या वेगाने व्हायरल झाले आणि आता युझर्सनी कमेंट्स सेक्शनमध्ये जोडप्यावर अभिनंदनाचा वर्षाव केला.
करिश्मा आणि वरुण यांनी 2022 साली लग्न केलं आणि या जोडप्याने सोशल मीडियावर आपल्या चाहत्यांसोबत सुंदर फोटो आणि व्हिडिओ शेअर केले. त्यांच्या लग्नानंतर चार वर्षांनी, बाळाचं आगमन होणार आहे. एप्रिलमध्ये त्यांनी ही गुड न्यूज शेअर केली होती. 'मॉम अँड डॅड' अशी कॅप घातलेले स्वतःचे सुंदर फोटो या जोडप्याने शेअर केले आणि अभिनेत्रीवर सर्व बाजूंनी अभिनंदनाचा वर्षाव झाला.
